అద్భుతమైన నటన, ఆకర్షించే అందంతో దక్షిణాది సినీ పరిశ్రమల్లో క్రేజీ నటిగా పేరు తెచ్చుకుంది సమంత. వరుస విజయాలతో టాలీవుడ్, కోలీవుడ్ ల్లో టాప్ హీరోయిన్ల జాబితాలో చేరింది. ఈ ఏడాది ఆమె నటించిన 24, ఆ..ఆ.. జనతా గ్యారేజ్ సూపర్ హిట్ అయి.. ఆమె స్థాయిని మరింత పెంచాయి. అయితే ఈ ముద్దుగుమ్మ యువ సామ్రాట్ అక్కినేని నాగ చైతన్య ప్రేమలో పడడంతో కొత్త సినిమాల జోలికి వెళ్లలేదు. త్వరలో పెళ్లి చేసుకోవడం ఖాయం కావడంతో సినిమాలకు దూరమవుతుందేమోనని అభిమానులు నిరాశ పడ్డారు.
పెళ్లి అయినా సినిమాలు చేస్తుందని చైతూ స్పష్టం చేయడంతో స్యామ్ ఫ్యాన్స్ ఆనందపడ్డారు. వారు సంతోషపడే మరో వార్త బయటికి వచ్చింది. దర్శకుడు పి.ఎస్.మిత్రన్ తమిళంలో విశాల్ హీరోగా తెరకెక్కించనున్న ‘ఇరుంబుతిరై’ అనే సినిమాలో హీరోయిన్ గా నటించేందుకు సమంత గ్రీన్ సిగ్నల్ ఇచ్చిందని సమాచారం. ఇందులో ఆమె పాత్రని విభిన్నంగా దర్శకుడు మలచినందువల్లే ఈ చిత్రానికి సైన్ చేసినట్లు తెలిసింది. ఈ భామ గతంలోను ఓ తమిళ సినిమాకు ఒకే చెప్పిన సంగతి తెలిసిందే. హీరో శివ కార్తికేయన్ హీరోగా నటిస్తున్న ఆ సినిమా త్వరలో సెట్స్ మీదకు వెళ్లనుంది.
