Satyadev, Vijay Deverakonda: మరో పవర్‌ఫుల్‌ పాత్ర పట్టేసిన సత్యదేవ్‌.. ఈసారి గట్టి ఫైటే!

కొంతమంది నటుల్ని చూసినప్పుడు ఇంతకంటే బెస్ట్‌ క్యారెక్టర్‌ పడాలి, పడితే అదిరిపోతుంది అని అనిపిస్తూ ఉంటుంది. అలాంటి నటుల్లో సత్యదేవ్‌ (Satya Dev) ఒకరు. హీరోగా, క్యారెక్టర్‌ ఆర్టిస్ట్‌గా, కీలక పాత్రల్లో నటిస్తూ వస్తున్నాడు సత్యదేవ్‌. అయితే సరైన సినిమాలు ఇంకా పడాలి అని అంటూ ఉంటారు ఫ్యాన్స్‌. గతంలో ఆయనకు కొన్ని సినిమాలు పడినా, అవి బాక్సాఫీసు దగ్గర సరిగ్గా వర్కవుట్ కాలేదు. ఇప్పుడు మరో మంచి పాత్ర పడుతోంది అని అంటున్నారు.

విజయ్‌ దేవరకొండ (Vijay Deverakonda) కథానాయకుడిగా గౌతమ్‌ తిన్ననూరి (Gowtam Tinnanuri) దర్శకత్వంలో ఓ చిత్రం రూపొందుతున్న విషయం తెలిసిందే. సితార ఎంటర్‌టైన్‌మెంట్స్‌ బ్యానర్‌పై ఈ సినిమా తెరకెక్కనుంది. స్పై యాక్షన్‌ థ్రిల్లర్‌గా రూపొందనున్న సినిమా గురించి ఓ ఆసక్తికర విషయం తెలిసొచ్చింది. అదే ఈ సినిమాలో నటుడు సత్యదేవ్‌ కీలక పాత్రలో కనిపించనున్నాడట. సగటు కీలక పాత్రధారిలా కాకుండా.. ఈ సినిమాలో ఆయనది పూర్తి నిడివి ఉన్న పాత్ర అని అంటున్నారు.

విజయ్‌ సినిమా కొత్త షెడ్యూల్‌ షూటింగ్‌ ప్రస్తుతం విశాఖపట్నంలో జరుగుతోంది. త్వరలో సినిమా టీమ్‌తో సత్యదేవ్‌ యాడ్‌ అవుతున్నాడట. అయితే ఆ పాత్రేంటి, ఎలా ఉండబోతోంది అనే విషయం తెలియాల్సి ఉంది. ఈ సినిమాలో విజయ్‌ పోలీసుగా కనిపిస్తాడు. కాబట్టి సత్యదేవ్‌ కూడా ఇంచుమించు అలాంటి పాత్రలోనే నటిస్తాడు అని అంటున్నారు. ఇక ఈ సినిమాలో విజయ్‌కు జోడీగా భాగ్యశ్రీ బోర్సే (Bhagyashree) నటిస్తోంది. ఇక పైన చెప్పినట్లు సత్యదేవ్‌కి ఇప్పటికే ‘గాడ్‌ ఫాదర్‌’ (Godfather) సినిమాలో మంచి పాత్రలోనే చేశాడు.

చిరంజీవి (Chiranjeevi) లాంటి స్టార్‌ హీరోకు ఆపోజిట్‌గా అంతటి బలమైన పాత్ర అందుకున్నాడు అంటే పెద్ద విషయమే అని చెప్పాలి. అయితే ఆ సినిమా అనుకున్నంత ఫలితం అందుకోలేకపోయింది. దీంతో పాత్ర దక్కినా ఫలితం దక్కలేదు. మరి ఇప్పుడు విజయ్‌ సినిమాతో అయినా మంచి విజయం అందుకుంటాడేమో చూడాలి. అయితే దాని కంటే ముందు విజయ్‌కు ఆ సినిమాతో భారీ విజయం దక్కాలి. ఇప్పటికే వరుస పరాజయాలతో ఇబ్బందిపడుతున్నాడు.