ప్రేమకథలను విభిన్నంగా తెరకెక్కించడంలో సుకుమార్ దిట్ట. అతను దర్శకత్వంలో వచ్చిన “100% లవ్‌” మూవీ విశేషంగా ఆకట్టుకుంది. నాగచైతన్య, తమన్నా జంటగా నటించిన ఈ మూవీ తెలుగు వారినే కాకుండా తమిళ ఫిలిం మేకర్స్ ని సైతం ఆకర్షించింది. ఈ చిత్రాన్ని తమిళ దర్శకుడు చంద్రమౌళి “100% కాదల్‌”గా తమిళంలో రీమేక్ చేస్తున్నారు. అర్జున్ రెడ్డి సినిమా ద్వారా తెలుగులోకి అడుగుపెట్టిన షాలిని పాండే ఒక్క సినిమాతోనే మంచి క్రేజ్ సంపాదించుకుంది. ఈమె తమిళంలో ఈ సినిమా ద్వారా అడుగుపెడుతోంది. జీవీ ప్రకాష్‌ కి జోడీగా నటించింది. షూటింగ్ పూర్తి చేసుకున్న ఈ మూవీ పోస్ట్ ప్రొడక్షన్ దశలో ఉంది.
త్వరలోనే థియేటర్లో రానున్న ఈ మూవీ గురించి డైరక్టర్ మీడియాకి వివరించారు. “ఇది తెలుగు రీమేక్ అయినప్పటికీ తమిళ నేటివిటీకి తగ్గట్టుగా కథలో పలు మార్పులు చేశాము. తెలుగులో నటించిన తమన్నాలో కొంచెం ఉత్తరాది ఛాయలు కనిపించాయి. అందుకే పక్కింటి అమ్మాయిగా కనిపించే హీరోయిన్‌ అయితే బాగుంటుందన్న కారణంతోనే తమిళ రీమేక్‌కు తమన్నాని తీసుకోలేదు. హీరోయిన్‌ పాత్రలో షాలినిపాండే 100శాతం న్యాయం చేసింది” అని షాలిని పై ప్రసంశలు గుప్పించారు. షాలినిపాండే కెరీర్‌లో ఈ చిత్రం మైలురాయిగా నిలిచిపోతుందని చెప్పారు. నాజర్‌, జయచిత్ర, మనోబాలా, తలైవాసల్‌ విజయ్‌ తదితరులు ముఖ్య పాత్రలు పోషించిన ఈ సినిమా రిలీజ్ డేట్ ని త్వరలోనే ప్రకటించనున్నారు.
