సినిమా రంగంలో హీరోయిన్స్ లైఫ్ టైమ్ చాలా తక్కువగా ఉంటుంది. ఉన్న అతి తక్కువ సమయంలో అవకాశాలను అందుకోవాలి… నాలుగు డబ్బులు వెనకేసుకోవాలి. ఆలోచిస్తూ కూర్చున్నా.. త్యాగాలు చేసినా ఎవరూ దండలు వేసి దండాలు కొట్టరు. నేటి తరం హీరోయిన్స్ మేకప్ వేసుకోకముందే ఈ పాఠాలను బుర్రలోకి ఎక్కించుకున్నారు. ఇండస్ట్రీ లోకి వచ్చిన తర్వాత వాటిని పాటిస్తున్నారు. “అర్జున్ రెడ్డి” సినిమాతో ఎంట్రీ ఇచ్చిన షాలిని పాండే.. ఈ చిత్రంతో వచ్చిన క్రేజ్ ని ఎలా వినియోగించుకోవాలో.. అలా వినియోగించుకుంటోంది. అర్జున్ రెడ్డి తర్వాత తమిళంలో “100% లవ్” రీమేక్‌కి సైన్ చేసిన ఈ భామ… సావిత్రి బయోపిక్ మహానటి లో ఓ రోల్ పోషిస్తోంది. తెలుగులో శర్వానంద్ సరసన కూడా ఛాన్స్ అందుకుంది.
ఇప్పుడు మరో హీరోయిన్ కి వచ్చిన ఛాన్స్ ని తన అకౌంట్ లో వేసుకుంది. నిఖిల్ సరసన నటించే అవకాశం పట్టేసింది. ప్రస్తుతం కన్నడ రీమేక్ “కిరాక్ పార్టీ” ని రిలీజ్ చేసే పనిలో బిజీగా ఉన్న నిఖిల్.. దీని తర్వాత కూడా తమిళ రీమేక్ “గణితన్ని” తెలుగులో చేయడానికి సిద్ధమవుతున్నారు. ఒరిజినల్ వెర్షన్ డైరెక్టర్ టి.ఎన్.సంతోష్ తెలుగులోనూ దర్శకత్వం వహిస్తుండగా… హీరోయిన్ గా అఖిల్ మూవీ “హలో”తో ఎంట్రీ ఇచ్చిన కళ్యాణి ప్రియదర్శన్‌ను అనుకున్నారు. కానీ ఎందుకో కారణం తెలియదు కానీ షాలిని పాండే ని ఫిక్స్ చేసినట్లు టాక్. అవకాశం కోల్పోయిన కళ్యాణి విచారిస్తుండగా.. వరుస ఆఫర్లు అందుకుంటున్న షాలిని ఆనందంలో ఉంది. బహుశా ఇలాంటి సంఘటనల నుంచే .. “అవకాశాలను అందుకోవడమే కాదు.. దాన్ని నిలబెట్టుకోవాలి..” అనే వాక్యం పుట్టి ఉంటుంది.
Home