డిసెంబరులో సూర్య ‘సింహ’ గర్జన

ఒకవైపు భిన్నమైన కథలు, పాత్రలతో సినిమాలు చేస్తూనే మరోవైపు కమర్షియల్ సినిమాలను చేస్తున్నారు సూర్య. వీటిలో 25వ చిత్రంగా చేసిన ‘సింగం’ (తెలుగులో యముడు) సినిమా సూర్య ఖ్యాతిని రెట్టింపు చేసింది. 2010లో వచ్చిన ఈ సినిమాకి సీక్వెల్ గా 2013లో హరి తెరకెక్కించిన సింగం 2 కూడా విజయపతాకం ఎగురవేసింది. ఇప్పుడు ఈ సిరీస్ లో మరో సినిమా వస్తున్న సంగతి తెలిసిందే. భారీ అంచనాలు నెలకొన్న ఈ సినిమా విడుదల తేదీని ఇటీవల చిత్ర బృందం ప్రకటించింది.

స్టూడియో గ్రీన్ సంస్థ నిర్మిస్తున్న ‘సింగం 3’ డిసెంబర్ 16న ప్రపంచ వ్యాప్తంగా విడుదల కానుంది. ప్రస్తుతం ఈ సినిమా చివరి దశలో ఉంది. గత రెండు సినిమాల్లోనూ హీరోయిన్ గా నటించిన అనుష్క ఈ సినిమాలోనూ సూర్యకి జంటగా నటిస్తుండగా, శృతి హాసన్ మరో హీరోయిన్ గా నటించనుంది. స్టార్ హీరోయిన్ గా బిజీ గా ఉండే శృతి దర్శకుడు హరితో ‘పూజ’ సినిమా చేసిన సంగతి తెలిసిందే. ఆ సాన్నిహిత్యంతోనే ఈ పాత్ర చేసిందని చెన్నై వర్గాలు అంటున్నాయి. హ్యారిస్ జైరాజ్ స్వరపరిచిన గీతాలు అక్టోబర్ ఆఖరున మార్కెట్ లోకి రానున్నాయి. ఈ సిరీస్ లో ఇప్పటికే రెండు విజయాలు అందుకున్న సూర్య ఈసారి తన సింహ గర్జనతో బాక్సాఫీస్ వద్ద కలెక్షన్ల వేట ఏ స్థాయిలో సాగిస్తాడో..!