విక్రమ్, తమన్నా జంటగా విజయ్ చందర్ దర్శకత్వంలో తెరకెక్కిన క్రైమ్ థ్రిల్లర్ “స్కెచ్” తమిళనాట సంక్రాంతికి విడుదలై యావరేజ్ గా నిలిచింది. ఈ చిత్రాన్ని తెలుగులోనూ “స్కెచ్” అనే పేరుతోనే జనవరి చివర్లో లేదా ఫిబ్రవరి మొదటివారంలో విడుదల చేసేందుకు సురేష్ బాబు సన్నాహాలు చేసినప్పటికీ.. తెలుగు సినిమాలకే థియేటర్ల లభ్యత ఆశించిన స్థాయిలో లేకపోవడం వల్ల కుదరలేదు. ఎట్టకేలకు “స్కెచ్” రిలీజ్ కి డేట్ తోపాటు థియేటర్లు కూడా దొరికాయి.
విక్రమ్ కి చాలా రోజుల తర్వాత లభించిన సక్సెస్ కావడంతోపాటు మాస్ ఆడియన్స్ నచ్చే అంశాలన్నీ పుష్కలంగా ఉన్న సినిమా కావడంతో “స్కెచ్” తెలుగులోనూ హిట్ అయ్యే అవకాశాలు ఎక్కువగా ఉన్నాయి.
స్లోమోషన్ యాక్షన్ సీక్వెన్స్ లు, తమన్నా సొగసులు, థ్రిల్లింగ్ స్క్రీన్ ప్లే, ట్విస్టులు ఈ సినిమాకి ప్రత్యేక ఆకర్షణలుగా నిలుస్తాయి. అందుకే విక్రమ్ కూడా ప్రత్యేక శ్రద్ధ తీసుకొని ఈ సినిమా తెలుగు రిలీజ్ కి కూడా భారీ స్థాయిలో ప్రమోషన్స్ లో పాల్గొనడంతోపాటు తానే స్వయంగా కొందరు మీడియా మిత్రులను “హిట్ సినిమా, కాస్త ప్రమోట్ చేయండి” అని కోరాడట. పాపం విక్రమ్ ఎంత కష్టపడినప్పటికీ అతనికి మంచి కమర్షియల్ హిట్ లభించి చాలా ఏళ్లవుతోంది. “స్కెచ్” సినిమాతోనైనా విక్రమ్ ఆశ తీరుతుందేమో చూడాలి.
ఇకపోతే.. విక్రమ్ ప్రస్తుతం 37 భాషల్లో 300 కోట్ల భారీ బడ్జెట్ తో తెరకెక్కనున్న పీరియాడిక్ ఫిలిమ్ “కర్ణ” సినిమా ప్రిపరేషన్ లో ఉన్నాడు. ఈ సినిమా సెట్స్ మీదకు వెళ్ళే ముందు తెలుగులోనూ మంచి హిట్ అందుకోవాలని చూస్తున్నాడు విక్రమ్.
Home
