Vijay: విజయ్‌ని సీఎంని కాకుండా చేసే ప్లాన్‌ జరుగుతున్నాయా?

ఇటీవల జరిగిన తమిళనాడు అసెంబ్లీ ఎన్నికల్లో అతిపెద్ద పార్టీగా ప్రముఖ కథానాయకుడు విజయ్‌ పార్టీ టీవీకే నిలిచిన విషయం తెలిసిందే. 108 స్థానాల్లో విజయ్‌ పార్టీ ఘన విజయం సాధించింది. అయితే పార్టీ అధికారంలోకి రావడానికి అవసరమైన మ్యాజిక్‌ ఫిగర్‌ 118 స్థానాలను అందుకోలేకపోయింది. దీంతో ఇప్పుడు తమిళనాడు ఆసక్తికరమైన రాజకీయ పరిస్థితులు ఏర్పడ్డాయి. ఈ క్రమంలో ప్రభుత్వం ఏర్పాటు చేయడానికి గవర్నర్‌ వద్దకు వెళ్లిన విజయ్‌కి అనూహ్య ప్రశ్న ఎదురైంది. ప్రభుత్వం ఏర్పాటు చేయడానికి అవసరమైన మెజారిటీ మీకు లేదు కదా అంటూ విజయ్‌ని గవర్నర్‌ ప్రశ్నించారు.

Vijay

దానికి కారణం విజయ్‌ దగ్గర ప్రస్తుతం 112 మంది ఎమ్మెల్యేలు మాత్రమే ఉన్నారు. టీవీకే తరఫున 107 మంది (విజయ్‌ రెండు చోట్ల గెలిచిన నేపథ్యంలో ఒక ఎమ్మెల్యే తక్కువ), కాంగ్రెస్‌ ఎమ్మెల్యేలు ఐదుగురు మాత్రమే ఉన్నారు. దీంతో 11 మంది ఎమ్మెల్యేల అవసరం ఇప్పుడు విజయ్‌కి వచ్చింది. ఈ క్రమంలో తమిళనాడు రాజకీయాల్లో అనూహ్య పరిణామాలు చోటుచేసుకుంటున్నాయి. డీఎంకే- అన్నాడీఎంకే కలిసి ప్రభుత్వాన్ని ఏర్పాటుచేస్తాయనే ప్రచారం జోరుగా జరుగుతోంది. రెండు పార్టీల మధ్య చర్చలు జరుగుతున్నాయని అన్నాడీఎంకే వర్గాలు చెబుతున్నాయి. అయితే అలాంటి ఆలోచన లేదని డీఎంకే వర్గాలు అంటున్నాయి.

డీఎంకే దగ్గర 59 మంది ఎమ్మెల్యేలు ఉన్నారు. అన్నాడీఎంకేకి 47 మంది ఎమ్మెల్యేల బలం ఉంది. మొత్తం కలిపితే 106 మంది. దీంతో ఈ రెండు పార్టీలు కలిసినా మెజారిటీ కోసం 12 మంది ఎమ్మెల్యేలు అవసరం. ఇతర పార్టీల మద్దతు కోసం విజయ్‌ పార్టీలాగే, ద్రవిడ పార్టీలు కూడా ప్రయత్నిస్తున్నాయని చర్చ జరుగుతోంది. మరి అతి పెద్ద పార్టీగా నిలిచిన విజయ్‌ పార్టీకి.. ద్రవిడ పార్టీలు కూటమిగా ఏర్పడి షాక్‌ ఇస్తాయా అనేది చూడాలి. ఒకవేళ ఇస్తే కనుక తమిళ రాజకీయాల్లో ఓ సంచలనం అవుతుంది. ఎందుకంటే ఎన్నికల్లో అతి పెద్ద పార్టీగా అవతరించిన పార్టీ అధికారం చేపట్టకుండా ఉంటుంది కాబట్టి.

‘పెద్ది’ సినిమా కోసం రామ్‌చరణ్‌ ‘క్యాంపా’ని వాడుతున్నాడా?