వైసీపీ ప్రభుత్వం నుండి ఆంధ్రప్రదేశ్ రాష్ట్రం విడుదల పొంది వంద రోజులు కావస్తోంది. ఈ వంద రోజుల్లో ముఖ్యమంత్రి చంద్రబాబు నాయుడు పాలన అద్భుతం అంటూ అంతా అభిప్రాయపడుతున్నారు. ఈ క్రమంలో నటుడు సోనూసూద్ (Sonu Sood) కూడా చంద్రబాబు ప్రభుత్వం గురించి గొప్పగా వివరించి ప్రశంసించారు. ఓ వీడియో ద్వారా సోనూ సూద్.. చంద్రబాబు వంద రోజుల పాలనపై స్పందించారు. అతను మాట్లాడుతూ… “ముఖ్యమంత్రి చంద్రబాబు నాయుడు తన విశిష్ట పాలనతో తొలి వంద రోజుల్లోనే ఏపీ ప్రజలు ఆనందంగా, సురక్షితంగా ఉండేలా చర్యలు తీసుకున్నారు.
ఈ 100 రోజుల పాలనతోనే ‘మేము సురక్షితంగా ఉన్నాము’ అనే నమ్మకం… ప్రజలకు కల్పించడంలో చంద్రబాబు చేసిన కృషి విజయవంతం అయ్యింది. ఆయన విజన్ తో రాష్ట్ర అభివృద్ధి కోసం శ్రమిస్తున్నారు చంద్రబాబు. ఒకప్పటి చంద్రబాబు పాలన మళ్ళీ గుర్తుకొస్తుంది. ఆంధ్రప్రదేశ్ కి చంద్రబాబు రూపంలో మంచి రోజులు వచ్చాయి. ప్రజలు కూడా ఆయన విధానాలను విశ్వసిస్తున్నారు. త్వరలోనే ఆయన్ని కలవాలనే ఆసక్తి నాలో ఉంది.
ఆంధ్రప్రదేశ్ అభివృద్ధి కొరకు నా వంతు సాయం నేను కూడా చేస్తాను” అంటూ సోనూ సూద్ (Sonu Sood) ప్రశంసల వర్షం కురిపించారు. వైసీపీ ప్రభుత్వం వల్ల ఆంధ్రప్రదేశ్ ప్రజలు అనేక ఇబ్బందులకు గురయ్యారు అనేది వాస్తవం.’రాష్ట్రాన్ని రూ.10 లక్షల కోట్ల అప్పుల్లో ముంచి, వ్యవస్థలను నాశనం చేసింది ఆ ప్రభుత్వం.
గత పాలనలో జరిగిన తప్పుల్ని సరిదిద్దుతున్నామని.. సంక్షేమం, అభివృద్ధిని సమాంతరంగా ముందుకు తీసుకువెళుతున్నామని’ ముఖ్యమంత్రి చంద్రబాబు హామీ ఇచ్చిన సంగతి తెలిసిందే. ఆయన మాటను నిలబెట్టుకోవడానికి ప్రతిక్షణం శ్రమిస్తున్నారు.
