#SorryHrithik: కంగనా.. జెన్‌జీ ఎంత పని చేసిందో చూశావా?

#SorryHrithik.. గత కొన్ని రోజులుగా ఎక్స్‌లో ట్రెండ్‌ అవుతున్న హ్యాష్‌ ట్యాగ్‌ ఇది. హృతిక్‌ రోషన్‌కి సారీ చెప్పాలి అనేది ఈ హ్యాష్‌ ట్యాగ్‌ ఉద్దేశం అనేది అందరికీ తెలిసిన విషయమే. అయితే ఎందుకు, ఏం జరిగింది అనేది ఇప్పుడు చర్చనీయాంశంగా మారింది. నీట్‌ పరీక్షల లీకేజీ నేపథ్యంలో మంత్రి ధర్మేంద్ర ప్రధాన్‌ రాజీనామా కోరుతూ కాక్రోచ్‌ జనతా పార్టీ నేతలు, జెన్‌జీ యువత నిరసన ప్రదర్శనలు చేసి.. కేంద్ర ప్రభుత్వాన్ని డిమాండ్‌ చేసి తాము అనుకున్నది సాధించారు. ఈ విషయంలో బీజేపీ నాయకులు, ప్రముఖ బాలీవుడ్‌ కథానాయిక కంగనా రనౌత్‌ చేసిన కామెంట్లే ఇప్పుడు #SorryHrithik హ్యాష్‌ ట్యాగ్‌ ట్రెండింగ్‌కి కారణం.

#SorryHrithik

బాలీవుడ్‌ ప్రేమకథలు, ప్రేమకథల రూమర్లలో హృతిక్ రోషన్ – కంగనా రనౌత్ కథ వేరు. తనను హృతిక్ మోసం చేశాడని కంగన అప్పట్లో విమర్శలు చేసింది. ఇప్పటికీ అవకాశం వచ్చినప్పుడల్లా ఆ తరహా విమర్శలు చేస్తుంటుంది. అయితే ఆమె ఎంపీ అయ్యాక ఆ ఎపిసోడ్ మరుగున పడింది. ఇప్పుడు మళ్లీ తెరపైకి వచ్చింది. ‘మనం హృతిక్ రోషన్‌కు క్షమాపణలు చెప్పాలి’ అంటూ సోషల్ మీడియాలో జెన్ జీ యువత వరుస పోస్టులు చేస్తున్నారు. దానికి అంతకుముందు ఆమె చేసిన వ్యాఖ్యలే కారణం.

కాక్రోచ్ జనతా పార్టీ ఘాటుగా విమర్శలు చేసే క్రమంలో సీజేపీ ప్రతినిధి సౌరవ్ దాస్‌ గురించి చులకనగా మాట్లాడింది కంగన. తన వయసులో నాకు రెండు జాతీయ అవార్డులు వచ్చాయి అని ఎగతాళి చేసింది. దానికి సౌరవ్‌ కూల్‌గా ‘నేను చూడటానికి యంగ్ హృతిక్ రోషన్‌లా ఉంటానని నా ఫ్రెండ్స్ అంటారు. అందుకే కంగనా రనౌత్ నా మీద పడి ఏడుస్తోంది’ అని వెటకారంగా మాట్లాడారు. అక్కడ హృతిక్‌ రోషన్‌ ప్రస్తావన రావడానికి కారణం. గతంలో హృతిక్‌, కంగన మధ్య జరిగిన విషయమే. ఆ విషయాన్ని గుర్తు చేసి కంగనకు కౌంటర్‌ వేశాడు సౌరవ్‌.

మరోవైపు సోషల్ మీడియాలో ట్రెండ్ గమనించిన హృతిక్ రోషన్ కూల్‌గా స్పందించాడు. ‘‘మీకు ఒకరు నచ్చడం లేదు కాబట్టి మరొకరి వైపు నిలబడటం మన సమాజంలో ఉన్న అతి పెద్ద సమస్య’’ అని కంగనకు కాస్త సపోర్టివ్‌గానే అన్నాడు. అలా అని ఇలా మాట్లాడటం సరికాదు అని అనలేదు. ఎందుకంటే కంగన వేసిన సైటైర్‌కే.. సౌరవ్‌ ఆ కౌంటర్‌ ఇచ్చాడు కాబట్టి. అయితే హృతిక్ రోషన్ వ్యాఖ్యలపై కంగనా స్పందించింది. ‘అగ్నికి ఆజ్యం పోయడం ఆపండి’ అని రాసుకొచ్చింది.

అయితే అక్కడ హృతిక్‌ ఆజ్యం పోసేవాడే అయితే.. నిజంగా తనకు కంగన క్షమాపణలు చెప్పాల్సిందే అనేవాడు. కానీ ఆయన అలా అనలేదు. నిజానికి సౌరవ్‌ను ఓ మాట అని.. ఆ తర్వాత మాటలు పడుతున్నది కంగన. ఇక్కడ తప్పెవరిదో ఆమెనే తెలుసుకోవాలి.

 రామ్‌కి ‘శైలజ’.. నితిన్‌కి ‘రుక్మిణి’.. ఆ సెంటిమెంట్‌ వర్కౌట్‌ అవుతుందా?