సంక్రాంతి బరిలోకి బాలయ్యతోపాటు రజనీకాంత్, అజిత్!

తెలుగు ప్రజలకు సంక్రాంతి పండుగ చాలా ప్రత్యేకమైనది. అది కేవలం మన సంస్కృతి-సాంప్రదాయాల విషయంలో మాత్రమే కాదు.. సినిమాల విషయంలో కూడా. ఆ పండుగనాడు ఉదయం పూజలు పూర్తి మద్యాహ్నం, సాయంత్రం, రాత్రి సినిమాలకు అంకితం అయిపోతుంటారు. అందుకే స్టార్ హీరోలు, యువ హీరోలు అన్న తేడా లేకుండా అందరూ తమ సినిమాలను సంక్రాంతి పండుగ సందర్భంగా ఒక రోజు అటు ఇటులో తమ సినిమాను విడుదల చేయాలని ప్లాన్ చేస్తుంటారు. 2019 సంక్రాంతి ఆల్రెడీ చాలా స్పెషల్ అయిపోయింది. అందుకు కారణం ఎన్టీఆర్ జీవితం ఆధారంగా క్రిష్ దర్శకత్వంలో బాలకృష్ణ కథానాయకుడిగా తెరకెక్కుతున్న “ఎన్టీఆర్ కథానాయకుడు” జనవరి 9న విడుదలకానుండడమే.

ఆ సినిమాతోపాటు రామ్ చరణ్ – బోయపాటిల క్రేజీ కాంబినేషన్ లో తెరకెక్కుతున్న సినిమాను కూడా సంక్రాంతికే విడుదల చేద్దామని ప్లాన్ చేస్తున్నారు. ఇప్పుడు ఈ ఇద్దరు స్టార్ హీరోస్ తోపాటు ఆలిండియా సూపర్ స్టార్ రజనీకాంత్ కూడా సంక్రాంతి బరిలో దిగుతున్నారు. ఆయన కథానాయకుడిగా కార్తీక్ సుబ్బరాజ్ దర్శకత్వంలో తెరకెక్కుతున్న “పెట్టా” చిత్రాన్ని జనవరి 11న విడుదల చేయడానికి సన్నాహాలు జరుగుతుండగా.. ఇప్పుడు అదే తరహాలో సంక్రాంతి సందర్భంగానే తన తాజా చిత్రం “విశ్వాసం”ను విడుదల చేయాలనుకొంటున్నాడు అజిత్. ఇలా నలుగురు స్టార్ హీరోస్ తమ చిత్రాలను ఏకకాలంలో అది కూడా సంక్రాంతికి విడుదల చేయడానికి పోటీపడుతుండడంతో బాక్సాఫీస్ వద్ద సిచ్యుయేషన్స్ వేడెక్కే అవకాశాలు పుష్కలంగా ఉన్నాయి.