సినిమా ప్రీరిలీజ్ ఈవెంట్లలో ఈ మధ్య ఇంటర్వ్యూలు ఎక్కువైపోయాయి. యాంకర్‌ సుమ (Suma Kanakala) మైక్‌ పట్టుకుని స్టేజీ దిగువకు వస్తున్నారు అంటే.. కచ్చితంగా మినీ ఇంటర్వ్యూకి రెడీ అయిపోవచ్చు. సినిమా టీమ్‌ని ఆమె కొన్ని సరదా ప్రశ్నలు అడగడం, వాళ్లు అంతే సరదాగా సమాధానాలు చెప్పడం అవుతూ ఉంటాయి. కొన్నిసార్లు సీరియస్‌ ప్రశ్నలు కూడా ఉంటాయి. ‘కుబేర’ (Kuberaa) సినిమా ప్రీరిలీజ్ ఈవెంట్లో లాంటి ఓ చర్చ జరిగింది. ఆసక్తికర సమాధానాలు కూడా వచ్చాయి.
తమిళంలో మీరు దర్శకత్వం వహించారు. తెలుగులో ఏ హీరోతో సినిమా చేయాలంటే ఏ హీరోను సెలక్ట్‌ చేసుకుంటారు అంటే.. ‘పవన్‌ కల్యాణ్‌’ (Pawan Kalyan) అంటూ ధనుష్‌ (Dhanush) టపీమని ఆన్సర్‌ ఇచ్చేశారు. దీంతో కార్యక్రమ ప్రాంగణమంతా గోల గోల అయిపోయింది. డబ్బు లేకపోయినా మనకు దక్కేది ఏంటి అని అడిగితే.. అమ్మ ప్రేమ అని ఎంతో ప్రేమగా చెప్పాడు ధనుష్‌ (Dhanush) . మీకు కూడా ఒకటో తారీఖు కష్టాలు ఉంటాయా అని అడిగితే.. ఎవరి స్థాయి కష్టాలు వారివి అని చెప్పాడు. మీరు రూ.150 సంపాదిస్తే రూ.200 సమస్యలుంటాయి. రూ.కోటి సంపాదిస్తే.. రూ. 2 కోట్ల సమస్యలుంటాయి అని జీవిత సత్యం తెలిపాడు.
ఇండస్ట్రీలో ప్రేమ విషయంలో కుబేరులు ఎవరు అని రాజమౌళిని (S. S. Rajamouli) సుమ అడిగితే.. నువ్వే అంటూ ఆమెనే చూపించారు. ప్రతి ఈవెంట్లో అందరినీ సొంతవారిలా భావిస్తావు. నిన్ను కుబేరిణి అనాలేమో అన్నారాయన. మీ తొలి సంపాదన ఎంత చెప్పొచ్చుగా అని అంటే.. అసిస్టెంట్‌ ఎడిటర్‌గా పని చేసిన సమయంలో తొలిసారిగా రూ.50 అందుకున్నా. దాంతో ఏం చేశానో కూడా గుర్తులేదు అని చెప్పారు జక్కన్న. ఆ తర్వాత ప్రశ్నలు రష్మిక (Rashmika Mandanna) వైపు వచ్చాయి. నాగార్జున (Nagarjuna) విషయంలో మిమ్మల్ని ఆకర్షించే అంశమేంటి? అని అడిగితే.. చాలా మంది అమ్మాయిలు, హీరోయిన్లు చెప్పినట్లుగానే ఛార్మ్‌ అని చెప్పింది రష్మిక.
మరి ధనుష్‌ విషయంలో అంటే.. ఏదైనా చేయగలిగే సత్తా అని అంది. మీ ‘సామి’ అల్లు అర్జున్‌ (Allu Arjun) గురించి ఏం చెబుతావు అంటే.. అతని స్వాగ్‌ అని అంది. ఆఖరిగా విజయ్‌ దేవరకొండ సంగతేంటి అంటే.. అన్నీ అని ఫుల్‌ క్లారిటీ ఇచ్చేసింది. నాగార్జున (Nagarjuna) దగ్గరకు వెళ్లిన సుమ.. డబ్బు సంపాదించాలంటే ఉండకూడని లక్షణాలు అని మంచి ప్రశ్న అడిగారు. నాగార్జున ఎంతో క్లియర్‌గా ఆశ, బద్ధకం ఉండకూడదు అని చెప్పారు. ఈ తరానికి ఏం సలహా ఇస్తారు అని అంటే.. ఫోన్‌ చూడడం ఆపండి అని లైఫ్‌ టిప్‌ ఇచ్చారు.
Home