డైరక్టర్ ని ఇబ్బంది పెడుతోన్న తమన్నా

తెలుగు చిత్ర పరిశ్రమలోని టాప్ హీరోయిన్స్ లో తమన్నా ఒకరు. గతఏడాది బాహుబలి కంక్లూజన్ లో కాసేపు కనిపించింది. జై లవ కుశ సినిమాలో స్వింగ్ జరా అంటూ స్పెషల్ సాంగ్ చేసింది. అంతేతప్ప ఆమె హీరోయిన్ గా నటించిన ఒక్క తెలుగు చిత్రం కూడా గతఏడాది రిలీజ్ కాలేదు. బాహుబలి సినిమా హిట్ తో ఎన్నో అవకాశాలు వస్తాయనుకున్న తమన్నాకి నిరాశే మిగిలింది. అందుకే ఇక నుంచి తన సినిమా పట్ల ఎక్కువ జాగ్రత్తలు తీసుకుంటోంది. ఇది వరకు సెట్స్ కి వచ్చామా.. డైరక్టర్ చెప్పినట్లు చేశామా ? అన్న తీరులో ఉండే తమన్నా.. సినిమా నిర్మాణంలో ఎక్కువగా ఇన్వాల్వ్ అవుతున్నట్లు తెలిసింది.

ప్రస్తుతం ఆమె క్వీన్ రీమేక్ లో నటిస్తోంది. నీలకంఠ దర్శకత్వం వహిస్తున్న ఈ మూవీ కొన్ని రోజులుగా షూటింగ్ జరుపుకుంటోంది. ఈ ప్రాజక్ట్ నుంచి నీలకంఠ బయటికి వచ్చేయాలని చూస్తున్నారని టాక్. కారణం తమన్నా ఓవర్ యాక్షన్ అంట. షూటింగ్‌ సమయంలో దర్శకుడు నీలకంఠానికి ప్రతి విషయంలోనూ తమన్నా సలహాలు, సూచనలు ఇస్తోందంట. ఇది భరించలేక పోతున్నట్లు సమాచారం. దీంతో ఈ ప్రాజక్ట్ ఆగిపోయే దశలో ఉందని చిత్ర బృదం వెల్లడించింది. ఇప్పటికైనా తమన్నా తన తీరు మార్చుకోకుంటే.. ఆమె ఇతర సినిమాలపై ప్రభావం పడనుంది.