Ranabaali: ‘రణబాలి’కి టికెట్ రేట్లు పెంచకపోవడమే మంచిదైందా?

సినిమా తీయడం ఒకెత్తు.. దానిని జనాల్లోకి తీసుకెళ్లడం ఇంకో ఎత్తు.. ఆ తర్వాత జనాలను థియేటర్ల వరకు తీసుకురావడం మరో ఎత్తు. ఈ విషయాలు తెలిసినా, వాటికి సరైన మార్గాలు తెలియక చాలా మంది దర్శక నిర్మాతలు కిందామీదా పడుతుంటారు. అందుకే నెలకు వందల సంఖ్యలో సినిమాలు వస్తున్నా.. బాక్సాఫీస్ వద్ద నిలబడేవి ఒకటి, రెండు మాత్రమే ఉంటున్నాయి. అంటే సక్సెస్ రేటు 2 నుంచి 3 శాతం మాత్రమే అన్నమాట.

Ranabaali

ఈ లాజిక్ తెలిసి సేఫ్ గేమ్ ఆడే నిర్మాణ సంస్థ ఏదైనా ఉందా? అంటే అది కచ్చితంగా ‘మైత్రీ మూవీ మేకర్స్’ అనే చెప్పాలి. ఆడియన్స్ మైండ్ సెట్ ఎప్పటికప్పుడు ఎలా ఉందో అంచనా వేయడంలో మైత్రీ సంస్థ ముందుంటుంది. ఉదాహరణకు ఇటీవల వచ్చిన ‘ఇరుముడి’నే తీసుకోండి. ఆ సినిమాని లిమిటెడ్ బడ్జెట్ తో తీశారు, ప్రమోషన్స్ బాగా చేశారు. జనాల్లో థియేటర్ కి వెళ్లాలనే ఆసక్తిని క్రియేట్ చేశారు. ఇంట్రెస్ట్ క్రియేట్ చేశాం కదా అని, భారీగా క్యాష్ చేసుకునేందుకు టికెట్ రేట్లు పెంచి ప్రేక్షకులపై భారం వేయలేదు.

అందుకే ఓ మాదిరి కంటెంట్ కలిగిన ‘ఇరుముడి’ బాక్సాఫీస్ వద్ద రూ.270 కోట్ల పైచిలుకు వసూళ్లు సాధించి బిగ్గెస్ట్ బ్లాక్ బస్టర్ గా నిలిచింది. ఇక ఇప్పుడు ‘రణబాలి'(Ranabaali) విషయానికి వస్తే.. రిలీజ్ కి ముందు ఈ సినిమాపై బజ్ లేదు. అలా అని మేకర్స్ గాలికి వదిలేయలేదు. సరైన ప్రమోషనల్ కంటెంట్ వదిలారు. జనాల్లో ఆసక్తిని క్రియేట్ చేశారు. ఇంత చేసినా రిలీజ్ కి ముందు ఈ సినిమాపై చాలా నెగిటివిటీ ఏర్పడింది. అయినప్పటికీ, పెద్ద సినిమా కదా.. ఓపెనింగ్స్ వరకు క్యాష్ చేసుకుని లైట్ తీసుకుందామని వాళ్ళు సరిపెట్టుకోలేదు.

టికెట్ రేట్లు పెంచే అవకాశం ఉన్నా ఆ మార్గాన్ని ఎంచుకోలేదు. సోషల్ మీడియాలో ‘రణబాలి’పై మిక్స్డ్ టాక్ ఉంది, కానీ రివ్యూలు పాజిటివ్ గా వచ్చాయి. ‘ఎలాగూ టికెట్ రేట్లు పెంచలేదు కాబట్టి.. ఒకసారి థియేటర్లలో చూద్దాం’ అనే ఆలోచనకు ప్రేక్షకులు వచ్చారు. దీనివల్ల వీకెండ్..కి మంచి వసూళ్లు వచ్చాయి. పండుగ సెలవులు ఇంకా మిగిలే ఉన్నాయి కాబట్టి.. ‘రణబాలి’ బ్రేక్ ఈవెన్ మార్క్ చేరుకునే అవకాశాలు కూడా మెండుగా ఉన్నాయి.

రజినీ నుండీ టాలీవుడ్ సీనియర్ హీరోలు నేర్చుకోవాల్సింది అదే?