టాలీవుడ్ సీనియర్ స్టార్ హీరోలలో ఒకరైన నాగార్జునకు (Nagarjuna) ప్రేక్షకులలో ఊహించని స్థాయిలో క్రేజ్ ఉంది. నాగార్జున సెప్టెంబర్ నెల 1వ తేదీన బిగ్ బాస్ షో సీజన్8 తో హోస్ట్ గా ప్రేక్షకుల ముందుకు రానున్నారు. ఈ షోలో పాల్గొనే కంటెస్టెంట్లు వీళ్లేనంటూ కొంతమంది కంటెస్టెంట్ల పేర్లు ఇప్పటికే సోషల్ మీడియాలో వైరల్ అవుతున్న సంగతి తెలిసిందే. నాగ్ పుట్టినరోజు సందర్భంగా నాగ్ కు సంబంధించిన ఆసక్తికర విషయాలు వైరల్ అవుతున్నాయి.
నాగ్ తన సినీ కెరీర్ లో ఎన్నో ప్రయోగాత్మక సినిమాలలో నటించారు. హిట్ ఫ్లాపులతో సంబంధం లేకుండా కెరీర్ ను కొనసాగించారు. దాదాపుగా 40 మంది కొత్త డైరెక్టర్లకు ఛాన్స్ ఇచ్చి ఆ డైరెక్టర్ల కెరీర్ కు నాగ్ తన వంతు సహాయసహకారాలు అందించారు. నాగ్ నటించిన శివ మూవీ ఒక విధంగా టాలీవుడ్ దిశనే మార్చిన సినిమా అని చెప్పడంలో ఏ మాత్రం సందేహం అక్కర్లేదు.
అన్నమయ్యతో నాగ్ ప్రేక్షకులకు తనలో కొత్త కోణాన్ని పరిచయం చేశారు. తనలో మార్పు రావడానికి ఈ సినిమానే కారణమని నాగార్జున చెబుతున్నారు. ఈ సినిమాకు రెండు జాతీయ పురస్కారాలతో పాటు తొమ్మిది నంది అవార్డులు, మూడు ఫిల్మ్ ఫేర్ అవార్డులు వచ్చాయి. అన్నమయ్య సినిమాలో నటించిన తర్వాత తనలో ఎంతో పరిణతి వచ్చిందని నాగార్జున ఒక సందర్భంలో చెప్పుకొచ్చారు.
నాగర్జున యువ అనే సీరియల్ లో కొన్ని నిమిషాల పాటు కనిపించారు. ఈ సీరియల్ నాగ్ నిర్మించిన హిట్ సీరియల్ కావడం గమనార్హం. ఆరు పదుల వయస్సులో కూడా ఫిట్ గా కనిపించే నాగ్ వర్కౌట్లు చేయడం, ప్రశాంతంగా ఉండటం తన గ్లామర్ సీక్రెట్ అని వెల్లడించారు. విక్రమ్ (Vikram) సినిమాతో హీరోగా కెరీర్ మొదలుపెట్టిన నాగ్ త్వరలో కుబేర సినిమాతో ప్రేక్షకుల ముందుకు రానున్నారు. నాగ్ మరెన్నో పుట్టినరోజులు జరుపుకోవడంతో పాటు మరిన్ని భారీ విజయాలను అందుకోవాలని ఫ్యాన్స్ కోరుకుంటున్నారు.
