Trvikram: ‘సార్’ ప్రీ రిలీజ్ వేడుకలో త్రివిక్రమ్ ఆసక్తికర కామెంట్లు!

‘సితార ఎంటర్టైన్మెంట్స్’ బ్యానర్లో రూపొందే సినిమాలపై ఆడియన్స్ లో ప్రత్యేకమైన అంచనాలు ఉంటాయి. ఎందుకంటే స్టార్ డైరెక్టర్ త్రివిక్రమ్ కు హోమ్ బ్యానర్ వంటిది ‘సితార..’.! ఆయన కూడా ఈ బ్యానర్లో రూపొందే సినిమాలకు ‘ ఫార్చ్యూన్ ఫోర్ సినిమాస్’ అనే సంస్థ పై నిర్మాణ భాగస్వామిగా వ్యవహరిస్తున్నారు. త్రివిక్రమ్ భార్య పేరుతో ‘ ఫార్చ్యూన్ ఫోర్ సినిమాస్’ బ్యానర్ రన్ అవుతుంది.ఇక ఈ బ్యానర్లో రూపొందిన తాజా చిత్రం ‘సార్’ ఫిబ్రవరి 17న విడుదల కాబోతుంది. ఇక ప్రమోషన్స్ లో భాగంగా ఏర్పాటు చేసిన ప్రీ రిలీజ్ వేడుకకు త్రివిక్రమ్ కూడా హాజరయ్యారు.

ఆయన స్పీచ్ కూడా అందరినీ ఆకట్టుకుంది. త్రివిక్రమ్ మాట్లాడుతూ.. “విద్య – వైద్యం అందరికీ అందుబాటులో ఉండాలి. కానీ వాటిని సామాన్యులకు దూరంగా తీసుకెళ్లే ప్రయత్నం ఎప్పుడూ జరుగుతూనే ఉంటుంది. ఒక మనిషి జీవన శైలిని మార్చగలిగేది చదువు మాత్రమే. డబ్బులేదనే కారణంగా చదువుకునే హక్కు లేదనడం ఎంతవరకు కరెక్ట్ అనేది ఈ సినిమా ద్వారా వెంకీ ప్రశ్నించాడు. అందుకే ఈ సినిమా నాకు చాలా బాగా నచ్చింది. డబ్బును బట్టి వీళ్లు చదువుకోగలరు. వాళ్లు చదువుకోలేరు అనే అడ్డు గీతలను ఎల్ కేజీ నుంచే గీసేస్తున్న రోజులివి.

ఇలాంటి ఒక సిస్టమ్ ను కరెక్ట్ చేయాల్సిన అవసరం ఎంతైనా ఉంది. నేను కూడా హైదారాబాద్ కు వచ్చిన కొత్తల్లో ట్యూషన్స్ చెప్పుకునే బ్రతికాను. ఒక టీచర్ కీ .. స్టూడెంట్ కి మధ్య ఎలాంటి బాండింగ్ ఉంటుందనేది నాకు తెలుసు. మన గురువులానే ఈ సినిమా కూడా మనకు ఎప్పటికీ గుర్తుండిపోతుంది.శివాజీ గణేశన్ ..

కమల్ తర్వాతి తరంలో నేను ధనుష్ కి ప్రత్యేకమైన స్థానాన్ని ఇస్తాను. ఒక సినిమా జయాపజయాలకు సంబంధించిన భయం ఆయనలో లేదు. వర్క్ చేయడాన్ని ఎంజాయ్ చేస్తాడు .. రిజల్ట్ ను పట్టించుకోడు. భాష పేరుతో ఇప్పుడు అడ్డుగోడలు లేవు .. ధనుష్ మనందరి వాడు. ప్రేమ వర్షాన్ని కురిపించి ‘సార్ ను భుజాలకు ఎత్తుకుందాం” అంటూ త్రివిక్రమ్ చెప్పుకొచ్చాడు.