ఏఎన్ఆర్ లా సుమంత్ ని చూసి షాక్ తిన్న వెంకటేష్

ఎన్టీఆర్ బయోపిక్ టీమ్ రోజుకో సర్ప్రైజ్ తో అందరినీ ఆశ్చర్యానికి గురిచేస్తోంది. క్రిష్ చేతికి ఈ ప్రాజక్ట్ వచ్చినప్పటి నుంచి షూటింగ్ పరుగులు పెడుతోంది. ఎన్టీఆర్ గా బాలకృష్ణ నటిస్తున్న సంగతి తెలిసిందే. అయితే అతన్ని అచుగుద్దినట్టు ఎన్టీఆర్ లా చూపించి ఔరా అనిపించారు. అలాగే రానా కూడా చంద్రబాబు నాయుడిగా మలిచి అందరి మెప్పు అందుకున్నారు. ఈ చిత్రంలో మరో కీలకమైన నటుడు అక్కినేని నాగేశ్వరరావు. ఆ పాత్రకు అక్కినేని మనవడు సుమంత్ ని తీసుకున్నారు. ఏఎన్ఆర్ పుట్టినరోజు సందర్భంగా అతని లుక్ ని రిలీజ్ చేశారు. ఈ లుక్ అందరితో శెభాష్ అనిపించుకుంది. ఈ లుక్ పై విక్టరీ వెంకటేష్ సంచలన కామెంట్స్ చేశారు.

”ఏఎన్ఆర్ లుక్ చూసి ఒక్క క్షణం పాటు నేను కన్ఫ్యూజ్ అయ్యా. అతను సుమంతా? లేక నాగేశ్వరరావా? అనేది అర్థం కాలేదు. లెజెండ్, గొప్ప వ్యక్తి ఏఎన్‌ఆర్ మా హృదయాల్లో ఎప్పటికీ నిలిచి ఉంటారు” అని ట్వీట్ చేశారు. ఈ చిత్రంలో తెలుగు నటీనటులే కాకుండా బాలీవుడ్ స్టార్స్ కూడా నటిస్తున్నారు. ఎన్టీఆర్ సతీమణి బసవతారకం పాత్రను విద్యాబాలన్ పోషిస్తున్నారు. కైకాల సత్యనారాయణ, నరేష్, మురళి శర్మ తదితరులు అలనాటి మహానుభావుల పాత్రల్లో కనిపించబోతున్నారు. సాయి కొర్రపాటి, విష్ణు ఇందూరిలతో కలిసి బాలయ్య నిర్మిస్తున్న ఈ మూవీ సంక్రాంతికి రిలీజ్ కానుంది.