తన పెళ్లి గురించి ఆసక్తికర కామెంట్ చేసిన విజయ్ దేవరకొండ

విజయదేవరకొండ వరుసగా మూడు విజయాలతో తెలుగులో క్రేజీ హీరో అయిపోయారు. పెళ్లి చూపులు, అర్జున్ రెడ్డి, గీత గోవిందం సినిమాలతో ఎక్కువ ఫాలోయింగ్ సంపాదించుకున్నారు. అమ్మాయిల కలల రాకుమారుడు అయిపోయారు. విదేశాల్లో విజయ్ పోస్టర్స్ కి ముద్దులు కూడా ఇస్తున్నారంటే ఎంత క్రేజ్ ఉందో తెలుసుకోవచ్చు. ఇక అతని పెళ్లి గురించి మాట్లాడుకునేవారు ఎక్కువయ్యారు. విజయ్ కి సినిమాకి రాకపూర్వమే ప్రేమికురాలు ఉన్నారని, ఆమెనే వచ్చే ఏడాది పెళ్లిచేసుకుంటారని.. వార్తలు వినిపిస్తున్నాయి. కొంతమంది అయితే విజయ్ కి పెళ్లి అయిపోయిందని రూమర్స్ సృష్టిస్తున్నారు.

ఈ గాసిప్స్ ని విజయ్ దేవరకొండ తనదైన శైలిలో కొట్టిపడేశారు. తన పెళ్లిపై క్లారిటీ ఇచ్చారు. “మొదట్లో నేను 40 ఏళ్లకు పెళ్లి చేసుకోవాలని అనుకున్నాను. ప్రస్తుతం దాన్ని 35కు తగ్గించాను. గీత గోవిందం సినిమానే నాలో మార్పుకు కారణమయింది” అని పేర్కొన్నారు. ఇంకా మాట్లాడుతూ.. “నా మైండ్ సెట్ కు పెద్దలు కుదిర్చిన పెళ్లి అసలు సెట్ కాదు. నేను ప్రేమ వివాహమే చేసుకుంటాను. ఆమె తెలంగాణకు చెందిన అమ్మాయి కావొచ్చు.. కాకపోవచ్చు. ప్రపంచంలో ఎవరైనా అయి ఉండొచ్చు. కానీ మేమిద్దరం కనెక్ట్ కావాలి. ఒకరినొకరు తెలుసుకోవాలి” అని విజయ్ స్పష్టం చేశారు. సో అమ్మాయిలు విజయ్ దేవరకొండపై ఆశలు పెట్టుకోవచ్చు.