Vijay Sethupathi: సెంట్రల్‌ గవర్న్‌మెంట్‌కి విజయ్‌ సేతుపతి రిక్వెస్ట్‌.. పట్టించుకుంటారా?

కేంద్రం వర్సెస్‌ తమిళనాడు.. గత కొన్నేళ్లుగా ఈ వార్‌ జరుగుతూనే ఉంది. ఇక్కడ వార్‌ అంటే లాంగ్వేజ్‌ వార్‌ అని. తమిళనాటు తమిళ వాడకం ఎలాగూ ఉంటుంది. అయితే కేంద్రానికి సంబంధించిన అంశాల విషయంలోనూ తమిళ వినియోగమే ఉండాలని, లేదంటే తమిళ వాడమకమూ ఉండాలని అక్కడి ప్రజలు చాలా ఏళ్లుగా పోరాడుతున్నారు. ఈ మేరకు అక్కడి రాజకీయ పార్టీలు పోరాటం చేస్తూనే ఉన్నాయి. ఈ క్రమంలో తమిళ సినిమా పరిశ్రమ నుండి వారికి సపోర్టుగా ఓ వాయిస్‌ బయటకు వచ్చింది.

Vijay Sethupathi

గతంలో కొంతమంది నటటులు ఇలా ముందుకొచ్చినా ఇటీవల కాలంలో అయితే ఆ అడుగు వేసింది విజయ్‌ సేతుపతి (Vijay Sethupathi). విలక్షణ నటుడిగా పేరు తెచ్చుకున్న ఆయన తొలిసారి తమిళ భాష వినియోగం గురించి మాట్లాడారు. అది కూడా కేంద్రం చేతిలో ఉన్న పాన్‌ కార్డుల విషయంలో. పాన్‌ కార్డుకు సంబంధించి కొన్ని మార్పులు చేయాలని విజయ్‌ సేతుపతి (Vijay Sethupathi) కేంద్ర ప్రభుత్వాన్ని రిక్వెస్ట్‌ చేశాడు. పాన్‌ కార్డు సమాచారాన్ని తమిళంలోనూ అందుబాటులో ఉంచాలని ఆయన కోరాడు.

ఇటీవల ఓ ఈవెంట్‌లో విజయ్‌ సేతుపతి మాట్లాడుతూ పాన్ కార్డు వివరాలు ప్రస్తుతం హిందీ, ఇంగ్లిష్‌లోనే ఉన్నాయని, దీని వల్ల ఆ భాషలు రాని వారు పాన్‌ కార్డు అప్‌డేట్‌ల విషయంలో ఇబ్బందులు ఎదుర్కొంటున్నారని వివరించారు. అయితే, పాన్‌ కార్డుకు సంబంధించిన విషయంలో తమిళ భాషను యాడ్ చేయడం కష్టమైనప్పటికీ ఓ ప్రయత్నం చేయాలని కోరారు. భాషతో సంబంధం లేకుండా పౌరులందరికీ అవసరమైన ఆర్థిక సమాచారం సులభంగా యాక్సెస్‌ చేసేలా పాన్‌కార్డు అప్‌డేట్‌లను వివిధ భాషల్లో అందుబాటులోకి తీసుకురావాలని ఆయన కోరారు.

ఈ నేపథ్యంలో ఆయనకు సపోర్టుగా ఇంకా ఎవరు మాట్లాడతారు అనే ప్రశ్న కూడా వినిపిస్తోంది. కేవలం తమిళ పరిశ్రమ నుండే కాదు ఇతర పరిశ్రమల నుండి కూడా ఇలాంటి విషయంలో స్పందన వస్తే కేంద్ర ప్రభుత్వ కార్యకలాపాల్లో ప్రాంతీయ భాషల వినియోగం కోసం గత కొన్నేళ్లుగా చాలామంది చేస్తున్న ప్రయత్నానికి ఊపొస్తుంది అని చెప్పాలి.