ఇతర సినిమా పరిశ్రమలతో పోలిస్తే తెలుగు హీరోలు కాస్త ఎక్కువ రిస్కీ ఫైట్లు చేస్తారు.. స్పోర్ట్స్ బ్యాక్డ్రాప్ సినిమాల్లో నటిస్తారు.. ఈ క్రమంలో గాయాల పాలవుతారు. కొంతమంది హీరోలు అయితే చొక్కా కూడా నలగకుండా డూప్ని పెట్టి ఇలాంటివి చేయిస్తున్నారు అనుకోండి. ఆ విషయం పక్కన పెడితే పైన చెప్పిన పనులు చేసి కొంతమంది హీరోలు గాయపడుతున్నారు. దీంతో సినిమా షూటింగ్ షెడ్యూల్స్ డిస్ట్రబ్ అయ్యి మొత్తం ఇబ్బంది వస్తోంది. ఆ సినిమా వల్ల ఇతర సినిమాల పరిస్థితి కూడా ఇబ్బందిగా మారుతోంది.
టాలీవుడ్లో ప్రస్తుతం గాయాల వార్తలు వరుస కడుతున్నాయి. డూప్లు లేకుండా చేయండి అని నెటిజన్లు అడుగుతున్నారనో, ట్రోలర్లు ట్రోల్ చేస్తున్నారనో లేక వారికే అనిపిస్తుందో తెలియదు కానీ ఇటీవల కాలంలో హీరోలు గాయాల పాలవ్వడం ఇబ్బందిగా మారింది. రీసెంట్గా రామ్చరణ్ గాయం కారణంగా శస్త్రచికిత్స చేయించుకున్నాడు. ఆ వార్త బయటకు వచ్చిన రోజే.. ఎన్టీఆర్ గాయపడ్డాడు అనే మేటర్ కూడా బయటకు వచ్చింది. ఇక మొన్నీ మధ్య బాలకృష్ణకు గాయమై, సర్జరీ కూడా చేశారు.
కొన్ని రోజుల క్రితం వరుణ్ తేజ్ గాయపడటంతో శస్త్రచికిత్స చేయించుకున్నాడు. కొత్త సినిమా ‘బరి’ కోసం వాలీబాల్ ఆడుతూ ప్రమాదవశాత్తు కాలు విరిగిందని నిహారిక నిర్మాణ సంస్థ తెలిపింది. ఇక ఇప్పుడు సర్జరీ చేయించుకున్న చరణ్.. మార్చి చివరి వారంలో ‘పెద్ది’ సినిమా షూటింగ్లోనే ఈ గాయం బారిన పడ్డాడు. ఆ తర్వాత కొద్ది రోజులకు అదే షూటింగ్లో ఎడమ కంటి దగ్గర్లో గాయమైంది. యాక్షన్ సీక్వెన్స్ చిత్రీకరిస్తున్నప్పుడు నుదుటిపై గాయాలయ్యాయి. గతంలో తగిలిన గాయాలకు ఇటీవల పవన్ సర్జరీ చేయించుకున్నారు.
ఫిబ్రవరిలో ‘ఫౌజీ’ సినిమా షూటింగ్ సమయంలో గుర్రపు స్వారీ చేస్తుండగా ప్రభాస్కు స్వల్ప గాయమైంది. గతేడాది నవంబరులో ‘బైకర్’ సినిమా చిత్రీకరణలో రాజశేఖర్ చీలమండ ఫ్రాక్చర్ అయింది. దీని కోసం ఆయనకు మేజర్ సర్జరీ జరిగింది. ఇదంతా చూస్తుంటే మన హీరోలు జాగ్రత్తగా ఉండాల్సిన అవసరం ఎంతైనా ఉందనిపిస్తోంది
