Tollywood: 2026 ఫస్టాఫ్‌ రివ్యూ.. తొలి నెల బ్లాక్‌బస్టర్‌.. ఆ తర్వాత పరిస్థితి ఏంటంటే?

మనం ఎప్పుడంటే అప్పుడు బాలీవుడ్‌ సినిమా పరిశ్రమ గురించి మాట్లాడుకుంటూ ‘ధీన స్థితి’లో ఉంది అంటూ చిన్నగా ఆనందపడుతుంటాం. కానీ టాలీవుడ్‌ నిజంగా బాలీవుడ్‌ కంటే బాగుందా అని చూస్తే కచ్చితంగా కాదు అనే సమాధానం వస్తుంది. 2026 ఫస్టాఫ్‌ రిపోర్టు చూస్తే ఈ విషయం మరోసారి నిరూపించేలా ఉంది. కావాలంటే మీరే చూడండి.. సుమారు 100 సినిమాలు విడుదలైతే.. విజయాలు చాలా తక్కువగా నమోదవ్వడమే సాక్ష్యం.

Tollywood

టాలీవుడ్‌లో ఈ ఆరు నెలల్లో భారీ విజయం ముఖ్యంగా లాభాలు తెచ్చిన విజయాలు అంటే రెండో, మూడో మాత్రమే కనిపిస్తున్నాయి. అవేంటా అని చూస్తే.. చిరంజీవి – అనిల్‌ రావిపూడి ‘మన శంకర వరప్రసాద్‌ గారు’ సినిమాకు భారీ లాభాలు వచ్చాయి. రామ్‌ చరణ్‌ సినిమా ‘పెద్ది’కి కూడా లాభాలు వచ్చాయి. ఈ రెండూ కాకుండా ఈ ఏడాది లాభాలు అనే మాట వినిపిస్తున్న మరో చిత్రం ‘మా ఇంటి బంగారం’ మాత్రమే. మిగిలిన సినిమాల్లో కొన్ని లాభాలు తెచ్చి పెట్టినా అవి చిన్న సినిమాలే.

ఈ ఆరు నెలల్లో అత్యధిక వసూళ్లు అందుకున్న సినిమాల వసూళ్ల లిస్ట్‌లో ఆఖరి స్థానంలో ఉన్నది రూ.18 కోట్లతో ‘విష్ణు విన్యాసం’ ఉందంటే టాలీవుడ్‌లో వసూళ్లు ఏ స్థాయిలో ఉన్నాయో అర్థం చేసుకోవచ్చు. ఈ లెక్కన విజయాలు మాత్రమే ఇప్పుడు చూద్దాం. ‘పెద్ది’ (రూ. 333 కోట్లు), ‘మన శంకరవ వర ప్రసాద్‌ గార’ (రూ.300 కోట్లు), ‘ది రాజా సాబ్‌’ (రూ.208 కోట్లు), ‘అనగనగా ఒక రాజు’ (రూ.100 కోట్లు), ‘ఉస్తాద్‌ భగత్‌ సింగ్‌’ (రూ. 95 కోట్లు), ‘మా ఇంటి బంగారం’ (రూ.55 కోట్లు), ‘డెకాయిట్‌’ (రూ.55 కోట్లు), ‘నారీ నారీ నడుమ మురారి’ (రూ.36 కోట్లు), ‘రాకాసా’ (రూ. 27 కోట్లు), ‘విష్ణు విన్యాసం’ (రూ.18 కోట్లు).

పై సినిమాల లిస్ట్‌లో వసూళ్లు చూసి విజయాలు అనుకునేరు. ఓపెనింగ్స్‌ సత్తా వల్ల ‘ది రాజా సాబ్‌’, ‘ఉస్తాద్‌ భగత్‌ సింగ్‌’ లాంటివి ఈ లిస్ట్‌లో ఉన్నాయి కానీ విజయాలు కావు. ఈ లిస్ట్‌లో లేకపోయినా మంచి విజయం అందుకున్న కొన్ని సినిమాలు చూస్తే.. ‘భర్త మహాశయులకు విజ్ఞప్తి’, ‘కపుల్‌ ఫ్రెండ్లీ’, ‘బైకర్‌’, ‘సింగ్‌ గీతం’ లాంటివి ఉన్నాయి. చూశారుగా ఇప్పుడు చెప్పండి టాలీవుడ్‌ పరిస్థితి బాగుందా?

‘ఇడుపు కాయితం’ మంట రాజేసి.. చలి కాచుకుందెవరు?