పవన్ కళ్యాణ్ పార్టీలోకి వెళ్లడంపై అలీ క్లారిటీ!

పవర్ స్టార్ పవన్ కళ్యాణ్ జన సేన పార్టీ స్థాపించినప్పటి నుంచి సమీకరణాలు వేగంగా మారిపోతున్నాయి. ఎన్నికలు దగ్గర పడుతుండడంతో పార్టీ లోకి ఎవరు చేరుతారు? ఎవరికి టికెట్ ఇస్తారు? అనే చర్చలు మొదలయ్యాయి. పవన్ పొలిటికల్ అడుగులు ఎలా ఉండబోతున్నాయనే.. ఆసక్తి అందరిలోనూ నెలకొని ఉంది. జనసేన పార్టీ గురించి, పవన్ ఆలోచనల గురించి అతని మిత్రుడు అలీని ప్రశ్నించగా ఆయన ఆసక్తికర సంగతులు వెల్లడించారు. “నేను, పవన్ షూటింగ్ సమయంలో సరదాగా గడుపుతుంటాము. ఎప్పుడూ జనసేన పార్టీ గురించి మాట్లాడుకోలేదు. జనసేన పార్టీ పెట్టేటప్పుడు మమ్మల్ని పిలవలేదు.

పెట్టినప్పుడు రమ్మని ఆహ్వానించలేదు. ఒంటరిగా పోరాడటానికి పవన్ సిద్ధమయ్యారు” అని అలీ చెప్పారు. పవన్ పార్టీలోకి ఆహ్వానిస్తే సేవ చేయడానికి తాను సిద్ధమని స్పష్టం చేశారు. తాను ఎన్నికల్లో పోటీచేస్తానా? లేదా? అనేది ఇప్పుడు చెప్పలేనని అలీ వెల్లడించారు. ప్రస్తుతం పవన్ త్రివిక్రమ్ శ్రీనివాస్ దర్శకత్వంలో మూవీ చేస్తున్నారు. అజ్ఞాతవాసి అనే టైటిల్ పరిశీలిస్తున్న ఈ చిత్రం సంక్రాంతికి రిలీజ్ కానుంది.