అల్లు అర్జున్ (Allu Arjun) ఫ్యాన్స్ అసోసియేషన్.. కొన్ని నెలల క్రితం ఏర్పాటైన ఈ అభిమాన సంఘం వివిధ రాష్ట్రాల్లో మంచి పనులు చేస్తోంది. కొన్ని సేవా కార్యక్రమాలు, కొన్ని అవగాహన కల్పించే కార్యక్రమాలను నిర్వహిస్తోంది. వారందరినీ ఒక దగ్గరకు తీసుకొచ్చి అల్లు అర్జున్ అండ్ కో. ఇటీవల ఓ కార్యక్రమం ఏర్పాటు చేసింది. వేల సంఖ్యలో ఫ్యాన్స్ వచ్చారు అంటూ మొదలైన కార్యక్రమం వందల సంఖ్యలో వచ్చారు అంటూ ముగిసింది. అక్కడేం జరిగింది, ఎంతమంది వచ్చారు అనే విషయాలను పక్కన పెడితే.. ఆ స్టేజీపై అల్లు అర్జున్ మాట్లాడిన విషయాలు మాత్రం అదిరిపోయాయి.
తన గురించి, తన అభిమానుల గురించి, వారు చేస్తున్న సేవా కార్యక్రమాల గురించి, తన టీమ్ గురించి, సన్నిహితుల గురించి బన్నీ బాగా మాట్లాడాడు. ఈ క్రమంలో టాక్ ఆఫ్ ది ఇండస్ట్రీ అయిన ఫ్యాన్ వార్ గురించి కూడా మాట్లాడాడు. ఆ మాటలు ఇప్పుడు ఆయన్ను శభాష్ అనేలా చేస్తున్నాయి. అలాగే ఓ ప్రశ్నను కూడా లేవనెత్తుతున్నాయి. ఒకరిపై విమర్శలు చేయడం సరైనది కాదు. మనకు నచ్చని వాళ్ల కోసం మన డబ్బు ఖర్చు పెట్టము. అలాగే, మనకు నచ్చని వాళ్ల కోసం మన సమయం, డబ్బు, శక్తి ఎందుకు ఖర్చు చేయాలి అని ప్రశ్నించారు.
సోషల్ మీడియాలో వచ్చే ట్రోల్పై స్పందించడం కంటే, ఆ సమయాన్ని మీ సొంత ఎదుగుదల కోసం ఉపయోగించుకోండి. మీకు నచ్చిన పని చేయండి. నీకు నచ్చిన అమ్మాయి ఇంటి ముందు కూర్చోండి. పర్లేదు కనీసం నువ్వు ఆ సమయాన్ని అయినా ఆస్వాదిస్తారు కదా. ఎవరినీ ఎప్పుడూ ట్రోల్స్ చేయకండి. టైమ్, ఎనర్జీ ఏదైనా అనుకోండి. ప్రతి మనిషికి ఒక రోజులో 100 శాతం ఉందనుకుంటే, దాన్ని మీరు దేనికి వాడతారనేది ముఖ్యం అని అభిమానులకు బన్నీ సూచించాడు.
అయితే, ఇక్కడ ఒకటే ప్రశ్న. బన్నీ (Allu Arjun) చెప్పిన మాటను తన అభిమానులు (అని చెప్పుకునేవాళ్లు) వింటారా అని. ఎందుకంటే బన్నీ స్పీచ్ని సోషల్ మీడియాలో షేర్ చేస్తూ.. ‘మీ హీరో ఎప్పుడైనా ఇలా మాట్లాడాడా? ఇలా మంచి మాటలు చెప్పాడా?’ అంటూ తిరిగి ఇతర హీరోలను, వారి ఫ్యాన్స్ ట్రోల్ చేస్తున్నారు. ఇదన్నమాట పరిస్థితి.
