ఇదిగో అప్‌డేట్‌.. అదిగో అప్‌డేట్‌.. అల్లదిగో పోస్టర్‌.. ఇదిగిదిగో టీజర్‌ అంటూ.. గత కొన్ని నెలలుగా మహేష్‌బాబు (Mahesh Babu) – రాజమౌళి (S. S. Rajamouli) సినిమా గురించి ఏదో రూపంలో పుకార్లు వస్తూనే ఉన్నాయి. సినిమా గురించి అక్కడ టీమ్‌ నుండి ఎవరూ ఏమీ మాట్లాడటం లేదు కానీ.. లీకులు అయితే వస్తూనే ఉన్నాయి. మొన్నీమధ్య గడ్డమం, మీసం లుక్‌లో మహేష్‌ విత్‌ దర్శకుడు రాజమౌళి అండ్‌ నిర్మాత కెఎల్‌ నారాయణ కనిపించారు. అయితే సినిమా ఎప్పుడు ప్రారంభం అనే విషయంలో సమాచారం మాత్రం లేదు.
అయితే, తాజాగా సినిమాకు సంబంధించి ఓ విషయం వైరల్‌గా మారింది. దగ్గరల్లో ఉన్న మహేష్‌ స్పెషల్‌ డేట్‌ నాడు సినిమా గురించి మేజర్‌ అప్‌డేట్స్‌ వస్తాయి అని అంటున్నారు. అంటే ఆ రోజు సినిమా గురించి రాజమౌళి ప్రెస్‌ మీట్‌ ఉండొచ్చు అని చెబుతున్నారు. దాంతోపాటు స్పెషల్‌ పోస్టర్‌ ఒకటి లాంచ్‌ చేస్తారని టాక్‌. అలాగే సినిమా కాస్ట్‌ అండ్‌ క్రూ గురించి కూడా మాట్లాడతారుఅని అంటున్నారు. అన్నీ చెప్పారు డేట్‌ ఏంటి అనేగా… దగ్గర్లో స్పెషల్‌ డేట్‌ అంటే మే 31.
సూపర్‌ స్టార్‌ కృష్ణ జయంతి మే 31నే అనే విషయం తెలిసిందే. ఆ రోజున ఏటా మహేష్‌ సినిమాల నుండి అప్‌డేట్స్‌ వస్తూ ఉంటాయి. పోస్టర్లు, టీజర్లు, ట్రైలర్లు ఇలా ఇస్తూ ఉంటారు. అయితే ఈ సారి కూడా ssmb29 సినిమా టీజర్‌ వస్తుంది అని అనుకున్నారంతా. అయితే ఇప్పుడు పరిస్థితి చూస్తుంటే ఆ రోజుకు కేవలం అనౌన్స్‌మెంట్‌తో సరిపెట్టేస్తారు అని అంటున్నారు. అయితే ఆ అనౌన్స్‌మెంట్‌ను భారీగా చేయాలని నిర్మాత ప్లాన్‌ చేస్తున్నారట.
సినిమా అనౌన్స్‌మెంట్ వీడియో కోసం ఇప్పటికే రాజమౌళి టీమ్‌ పని చేస్తోందట. అది చూశాక సినిమా మీద అంచనాలు డబుల్‌, ట్రిపుల్‌ అవుతాయి అని అంటున్నారు. ప్రపంచవీరుడి కథతో ఈ సినిమా తెరకెక్కనుంది అని ఇప్పటికే చెప్పేశారు. మరి ఆ సంగతేంటో, వీరుడి లెక్కేంటో మే 31న చూద్దాం. అయితే కండిషన్స్‌ అప్లై.. ఎందుకంటే రాజమౌళి అన్నీ ప్లానింగ్ ప్రకారమే చేయరు కదా.
