ఆ నియోజకవర్గంలో పవన్ ను గెలిపించండి.. చిరంజీవి కామెంట్స్ వైరల్!

మెగాస్టార్ చిరంజీవి (Chiranjeevi) సరిగ్గా ఏపీ ఎన్నికల సమయంలో తన తమ్ముడిపై ప్రేమను చాటుకుంటున్నారు. ఇప్పటికే జనసేన కోసం 5 కోట్ల రూపాయల విరాళం ఇచ్చిన చిరంజీవి తాజాగా పవన్ కు (Pawan Kalyan) సపోర్ట్ చేస్తూ రిలీజ్ చేసిన వీడియో నెట్టింట వైరల్ అవుతున్నాయి. చిరంజీవి వీడియోలో పవన్ కళ్యాణ్ గురించి, పవన్ ఆలోచనల గురించి ప్రశంసల వర్షం కురిపించారు. పవన్ కళ్యాణ్ ను గెలిపించాలని మెగాస్టార్ పిలుపునిచ్చారు. అమ్మ కడుపులో ఆఖరి వాడిగా పుట్టినా పవన్ కళ్యాణ్ జనానికి మంచి చేయడంలో ముందుంటాడని పేర్కొన్నారు.

తాను బలంగా నమ్మిన సిద్ధాంతాల కోసం పవన్ కళ్యాణ్ జీవితాన్ని రాజకీయాలకు అంకితం చేసిన వ్యక్తి అని చిరంజీవి చెప్పుకొచ్చారు. ప్రజల కొరకు ఆ శక్తిని వినియోగించాలంటే ఆ గొంతు చట్ట సభలలో వినిపించాలంటే పిఠాపురం ఓటర్లు జనసేనానిని గెలిపించాలని మెగాస్టార్ అన్నారు. పవన్ లాంటి నాయకుడు జనాలకు కావాలని అనిపిస్తోందని పవన్ మీకు సేవకుడిగా, సైనికుడిగా, అన్నయ్యగా నిలబడతాడని మీకోసం కలబడి మీ కలలను నిజం చేస్తాడని చిరంజీవి వెల్లడించారు.

పవన్ తన సొంత సంపాదనను కౌలు రైతుల కోసం ఖర్చు చేశాడని జవాన్ల కోసం పెద్ద మొత్తం సహాయం అందించాడని చిరంజీవి వెల్లడించారు. సరిగ్గా ఎన్నికల సమయంలో చిరంజీవి పవన్ కళ్యాణ్ కు సపోర్ట్ చేయడంతో ఫ్యాన్ సంతోషానికి అవధులు లేకుండా పోయాయి. చిరంజీవి సపోర్ట్ పవన్ కు మరింత ప్లస్ అవుతుందని కామెంట్లు వినిపిస్తున్నాయి.

పిఠాపురంలో పవన్ తరపున చిరంజీవి ప్రచారం చేసే ఛాన్స్ ఉందని వినిపిస్తున్నా ఆ ప్రచారంలో నిజానిజాలు తెలియాల్సి ఉంది. చిరంజీవి వైపు నుంచి ఇందుకు సంబంధించి క్లారిటీ రావాల్సి ఉంది. మరోవైపు పవన్ కళ్యాణ్ పిఠాపురంలో లక్ష మెజార్టీతో గెలుస్తానని నమ్మకంతో ఉన్నారు. వైసీపీ నుంచి ఈ నియోజకవర్గంలో వంగా గీత పోటీ చేస్తున్నారు.