Dacoit Review in Telugu: డెకాయిట్ సినిమా రివ్యూ & రేటింగ్!

ఈ క్రైమ్‌లో కావాల‌నే స‌ర‌స్వ‌తిని పార్ట్‌న‌ర్‌గా సెలెక్ట్ చేసుకుంటాడు. డ‌బ్బు కోసం హ‌రితో క‌లిసి దొంగ‌త‌నం చేయ‌డానికి స‌ర‌స్వ‌తి ఒప్పుకుంటుంది. డ‌బ్బు దొంగ‌త‌నం చేసి స‌ర‌స్వ‌తిని పోలీసులు ముందు ఇరికించి తాను ఎస్కేప్ కావాల‌ని హ‌రి అనుకుంటాడు. అత‌డి ప్లాన్ వ‌ర్క‌వుట్ అయ్యిందా? ప‌్రాణంగా ప్రేమించిన స‌ర‌స్వ‌తిపై అత‌డు ప్ర‌తీకారం తీర్చుకున్నాడా? స‌ర‌స్వ‌తి గురించి హ‌రికి తెలిసిన షాకింగ్ నిజం ఏమిటి? హ‌రికి వ్య‌తిరేకంగా స‌ర‌స్వ‌తి ఎందుకు త‌ప్పుడు సాక్ష్యం చెప్పింది? స‌ర‌స్వ‌తి ప్రేమ కోసం హ‌రి ఎలాంటి త్యాగానికి సిద్ధ‌ప‌డ్డాడు? వారి లైఫ్‌లోకి పోలీస్ ఆఫీస‌ర్ స్వామి (అనురాగ్ క‌శ్య‌ప్‌), మ‌ల్లి (కామాక్షి భాస్క‌ర్ల‌) ఎలా వ‌చ్చారు అన్న‌దే డెకాయిట్ మూవీ క‌థ‌.

న‌టీన‌టుల ప‌నితీరు: డెకాయిట్‌కు (Dacoit) అడివిశేష్ వ‌న్ మెన్ షోగా నిలిచాడు. హీరోగా ఎక్కువ‌గా క్లాస్ పాత్ర‌లు చేసిన అడివిశేష్ ఇందులో మాస్ రోల్‌లో మెప్పించాడు. మ్యాన‌రిజ‌మ్స్‌, బాడీలాంగ్వేజ్ కొత్త‌గా ఉన్నాయి. హ‌రి పాత్ర కోసం మ‌ద‌న‌ప‌ల్లి యాస‌ కూడా నేర్చుకున్నాడు. ఈ సినిమా కోసం అత‌డు పెట్టిన ఎఫ‌ర్ట్స్ ప్ర‌తి సీన్‌లో క‌నిపిస్తాయి. స‌ర‌స్వ‌తి పాత్ర‌కు మృణాల్ ప‌ర్‌ఫెక్ట్ యాప్ట్‌గా నిలిచింది. ఎమోష‌న‌ల్ సీన్స్‌లో అడివిశేష్‌తో పోటీప‌డింది. ప్రియురాలిగా, భార్య‌గా, త‌ల్లిగా మ‌ల్టీపుల్ షేడ్స్‌తో కూడిన పాత్ర‌లో చ‌క్క‌టి వేరియేష‌న్స్ చూపించింది. వీరిద్ద‌రు మిన‌హా మిగిలిన పాత్ర‌ల‌కు సినిమాలో పెద్ద‌గా స్కోప్ లేదు. అనురాగ్ క‌శ్య‌ప్‌, ప్ర‌కాష్ రాజ్‌, సునీల్‌, జైన్ మేరీ ఖాన్ లాంటి ప్ర‌తిభావంతుల‌ను స‌రిగ్గా వాడుకోలేదు.

సాంకేతిక వ‌ర్గం ప‌నితీరు: టెక్నిక‌ల్‌గా మాత్రం డెకాయిట్ బ్రిలియంట్ మూవీ. హీరోగానే కాకుండా రైట‌ర్‌గా కూడా అడ‌విశేష్ ఆక‌ట్టుకున్నాడు. డైరెక్ట‌ర్ షానీల్ డియోతో క‌లిసి ఈ సినిమాకు క‌థ‌ను అందించాడు. రాయ‌ల‌సీమ యాస‌లో అబ్బూరి ర‌వి డైలాగ్స్ నాచుర‌ల్‌గా ఉన్నాయి. భీమ్స్ పాట‌ల్లో సోసోగా ఉన్నా గ్యానీ బీజీఎమ్ మాత్రం అదిరిపోయింది. క‌థ‌లోని ఫీల్‌ను చాలా సార్లు బీజీఎమ్ ఎలివేట్ చేసింది. ధ‌నుష్ భాస్క‌ర్ సినిమాటోగ్ర‌ఫీ రిచ్ ఫీల్‌ను క‌లిగించింది. ఈ సినిమాకు నిర్మాత సుప్రియ యార్ల‌గ‌డ్డ కూడా ఓ హీరోగా నిలిచింది. భారీ బ‌డ్జెట్ సినిమాల లెవెల్‌లో మేకింగ్ వాల్యూస్ ఉన్నాయి.

విశ్లేష‌ణ‌: సాధార‌ణంగా వెండితెర ప్రేమ‌క‌థ‌ల‌న్నీ ఒకే ఫార్మెట్‌లో సాగుతాయి. త‌మ‌కు ఎదురైన క‌ష్టాల‌న్నింటిని దాటుకొని చివ‌ర‌కు హీరోహీరోయిన్లు క‌లుసుకోవ‌డంతోనే క‌థ సుఖాంతం అవుతుంది. బ్లాక్ అండ్ వైట్ కాలం నుంచి నేటి వ‌ర‌కు ఇదే ఫార్ములాను ఫాలో అవుతున్నారు టాలీవుడ్ రైట‌ర్లు, డైరెక్ట‌ర్లు ఈ రొటీన్ టెంప్లేట్‌ స్టోరీస్‌కు భిన్నంగా అడివిశేష్ చేసిన ప్ర‌య‌త్న‌మే డెకాయిట్‌. ప్రేమ‌క‌థ‌లంటే నాలుగు డ్యూయెట్లు, రొమాంటిక్ సీన్లు, హ్యాపీ ఎండింగ్‌ ఉండాల‌నే రూల్స్ మొత్తాన్ని ఈ సినిమాతో తిర‌గ‌రాశారు. నిజ‌మైన ప్రేమ ఎప్పుడూ ప్ర‌తీకారాన్ని కోరుకోదు…ఎలాంటి త్యాగానికి అయినా సిద్ధ‌ప‌డుతుంద‌నే అంశాన్ని క్రైమ్ ఎలిమెంట్‌, రివేంజ్ డ్రామాను జోడించి బ్యూటీఫుల్ ఎమోష‌న‌ల్ ల‌వ్‌స్టోరీగా ఈ సినిమాను తెర‌కెక్కించారు ద‌ర్శ‌కుడు షానిల్ డియో.

జైలులో ఖైదీగా అడివిశేష్ ప‌రిచ‌య‌మ‌య్యే సీన్‌తోనే డెకాయిట్ ఆస‌క్తిక‌రంగా మొద‌ల‌వుతుంది. ఫ్లాష్‌బ్యాక్ ఎపిసోడ్స్‌తో హ‌రి, స‌ర‌స్వ‌తి ప్రేమ‌క‌థ‌ను చూపించారు. కులాల అంత‌రాల‌తో రెట్రో స్టైల్‌లో నాచుర‌ల్‌గా ఈ ల‌వ్‌స్టోరీని ప్ర‌జెంట్ చేయ‌డం బాగుంది. హ‌రి జైలు నుంచి త‌ప్పించుకున్న సీన్ నుంచి సినిమా క్రైమ్ జాన‌ర్‌లోకి షిప్ట్ అవుతుంది.

క‌రోనా టైమ్‌లో కొవిడ్ ట్రీట్‌మెంట్ పేరుతో హాస్పిట‌ల్స్ జ‌నాల నుంచి ఎలా దోచుకున్నాయ‌నే పాయింట్‌తో క్రైమ్ ఎపిసోడ్‌ను అడివిశేష్, షానీల్ డియో ఆస‌క్తిక‌రంగా రాసుకున్నారు. ఈ పాయింట్ కొత్త‌గా ఉంది. స‌ర‌స్వ‌తిని మోసం చేయాల‌ని హ‌రి అనుకోవ‌డం….అత‌డిని ప‌ట్టుకోవ‌డానికి పోలీస్ ఆఫీస‌ర్ల‌తో పాటు ప్ర‌కాష్ రాజ్ మ‌నుషులు వేసే ఎత్తుల‌తో థ్రిల్లింగ్‌గా ఫ‌స్ట్ హాఫ్ సాగుతుంది. ఇంట‌ర్వెల్ హై అనే ఫీల్ ఇవ్వ‌క‌పోయినా ఒకే అనిపిస్తుంది.

డెకాయిట్ (Dacoit) సెకండాఫ్ కంప్లీట్ ఎమోష‌న‌ల్‌గా సాగుతుంది. మృణాల్ పాత్ర‌కు సంబంధించి వ‌చ్చే ట్విస్ట్ అదిరిపోతుంది. ఫ‌స్ట్ హాఫ్‌లోని ప్ర‌శ్న‌ల్నింటికి సెకండాఫ్‌లో స‌మాధాన‌మిస్తూ రోల‌ర్ కోస్ట‌ర్ రైడ్‌లా సినిమా సాగుతుంది. క్లైమాక్స్ ఆడియెన్స్ ఏ మాత్రం గెస్ చేయ‌లేద‌ని విధంగా ఎమోష‌న‌ల్‌గా ఉంటుంది. ఇలాంటి క్లైమాక్స్‌తో సినిమా చేయ‌డ‌మంటే కొంత రిస్క్ అనే చెప్పాలి. గ‌తంలో ఈ విధ‌మైన ఎండింగ్‌ వ‌చ్చిన సినిమాలు ఏవి ఆడ‌లేదు. కానీ క‌మ‌ర్షియ‌ల్ హంగులు, సెంటిమెంట్ల గురించి ఆలోచించ‌కుండా నిజాయితీగా తాము ఏం చెప్పాల‌ని అనుకున్నారో అదే చూపించారు మేక‌ర్స్‌.

డెకాయిట్ కాన్సెప్ట్ కొత్త‌గా ఉన్నా స్క్రీన్‌ప్లే మాత్రం చాలా ప్రెడిక్ట‌బుల్‌గా సాగుతుంది. హాస్పిట‌ల్ నుంచి డ‌బ్బులు కొట్టేసే సీన్స్‌లో థ్రిల్ ఆశించిన స్థాయిలో వ‌ర్క‌వుట్ కాలేదు. ఒకే త‌ర‌హాలో మూడుసార్లు దొంగ‌త‌నం చేయ‌డం లాజిక్‌లెస్‌గా అనిపిస్తుంది. క్రైమ్ థ్రిల్ల‌ర్‌సినిమాల్లో ఉండే వేగం ఇందులో లేదు. క్లైమాక్స్ ఈ సినిమాకు ప్ల‌స్‌తో పాటు మైన‌స్‌గా నిలిచింది. క‌మ‌ర్షియ‌ల్ ఆడియెన్స్ ఇలాంటి క్లైమాక్స్‌కు క‌నెక్ట్ కావ‌డం కొంత క‌ష్ట‌మే.

ఫోక‌స్ పాయింట్‌: డెకాయిట్ జెన్యూన్ ల‌వ్‌స్టోరీ

రేటింగ్ : 2.5/5

Click Here To Read in ENGLISH