సర్, నేను ఆకాశంలో ఎగురుతాను అని ఎవరైనా స్టూడెంట్ టీచర్ దగ్గర చెబితే.. ‘ముందు నేలపై సరిగ్గా నడువు’ అని చెబుతారు. ఇక్కడ సరిగ్గా నడవకుండా గాల్లో ఎగిరి ఏం చేస్తారు అనేది ఆయన ఉద్దేశం అవుతుంది. ఇప్పుడు యువ దర్శకుడు బుచ్చిబాబు సానాను మాటలు చూసి రామ్ చరణ్ అభిమానులు ఇలానే అంటున్నారు. ఎందుకంటే చేతుల్లో ఉన్న సినిమానే చెప్పిన టైమ్స్కి రిలీజ్ చేయక వాయిదాలు వేస్తూ ఇప్పుడు మరో ఛాన్స్ ఇవ్వమని అడుగుతున్నారు ఆయన.
రామ్చరన్ ఇటీవల అంతర్జాతీయ మ్యాగజీన్ ‘ఎస్క్వైర్ ఇండియా’కు స్పెషల్ ఇంటర్వ్యూ ఇచ్చిన విషయం తెలిసిందే. దీనికి సంబంధించిన వీడియోను ఆయన తన ఇన్స్టాగ్రామ్లో పోస్ట్ చేశారు. ఇక ఆ మ్యాగజీన్ కవర్ పేజీ కోసం ఆయన ఇచ్చిన ఫోటోల్లో స్టైలిష్ లుక్కి అభిమానులు ఫిదా అవుతున్నారు. ఆ ఫొటోలకే దర్శకుడు బుచ్చిబాబు చేసిన కామెంట్ ఇప్పుడు వైరల్గా మారింది. ‘సర్.. మరో అవకాశం ఇవ్వండి’ అనేది ఆ కామెంట్.
ఆ చిన్న కామెంట్ ఇప్పుడు సోషల్ మీడియాలో వైరల్ అవుతోంది. కొంతమంది ఇలా కామెంట్ చేశారేంటి అనుకుంటుంటే.. ‘పెద్ది’ తర్వాత వీరి కాంబినేషన్లో మరో సినిమా రానుందని మరికొందరు అనుకుంటున్నారు. అంతేకాదు ఆ సినిమా గ్యాంగ్స్టర్ నేపథ్యంలో ఉండొచ్చు అని లెక్కలేసుకుంటున్నారు. ఎందుకంటే చరణ్ ఇప్పుడున్న లాంగ్ హెయిర్ + బియర్డ్ లుక్ గ్యాంగ్స్టర్ పాత్రలకు బాగా నప్పుతుంది అనేది అభిమానుల మాట. మరి చరణ్ ఏం చేస్తాడో చూడాలి.
ఏప్రిల్ 30న రావాల్సిన ‘పెద్ది’ సినిమాను జూన్కి మారిపోయింది. డేట్ ఎప్పుడో చెప్పకపోయినా నెల చెప్పేశారు. ఈ సినిమా తర్వాత చరణ్ కొన్ని రోజులు రెస్ట్ తీసుకొని ఆ తర్వాత సుకుమార్ డైరక్షన్లో సినిమా సెట్లో అడుగుపెడతాడని సమాచారం. త్వరలోనే దీనిపై క్లారిటీ వస్తుంది అంటున్నారు. అయితే ఈ సినిమా కథ ఇంకా సిద్ధం కాలేదు అనేది సన్నిహిత వర్గాల సమాచారం. మరోసారి సుకుమార్ టీమ్ అంతా కూర్చుని పని పూర్తి చేయాలని అనుకుంటున్నారట.
