విశ్వనటుడు కమల్ హాసన్ అభిమానులకు చేదు వార్త. అతనితో కలిసి సహజీవనం చేస్తున్న గౌతమి తాము విడిపోతున్నట్లు ప్రకటించింది. ఈ వార్తను సినీ పరిశ్రమ వర్గాలు జీర్ణించుకులేక పోతున్నాయి. ఆంధ్రప్రదేశ్లోని పశ్చిమగోదావరి జిల్లాలో పుట్టిన గౌతమి విశాఖలోని గీతం యూనివర్సిటీలో ఇంజనీరింగ్ చదివారు. ఆమె దయామయులు అనే చిత్రం ద్వారా చిత్రపరిశ్రమలోకి అడుగుపెట్టారు. అనేక విజయాలను అందుకున్నారు. సినీ కెరీర్ బాగా ఉన్నప్పుడే గౌతమి వ్యాపారవేత్త సందీప్ భాటియాను 1998లో పెళ్లాడారు. వీరిద్దరికీ ఒక పాప పుట్టింది. ఆ తర్వాతే భర్త నుంచి విడాకులు తీసుకున్నారు. 2003 నుంచి కమల్తో సహజీవనం చేశారు. ఈ 13 ఏళ్ల ప్రయాణంలో ఒకరికొకరు అండగా నిలిచారు. గౌతమికి క్యాన్సర్ వచ్చినప్పుడు కమల్ తోడుగా ఉండి మహమ్మారిని జయించే శక్తిని అందించారు.
కమల్ కి కూడా గౌతమి పలు విపత్కర సందర్భాల్లో అండగా నిలిచారు. విశ్వరూపం సినిమా సమయంలో కమల్ ఇబ్బందుల్లో ఇరుక్కున్నపుడు ఆమె పూర్తి మద్దతు తెలిపారు. ఇలా ఎంతో అన్యోన్యంగా ఉన్న వీరిమధ్య ఎటువంటి గొడవలు వచ్చాయో తెలియదు కానీ.. ఈరోజు మీడియా ముఖంగా గౌతమి కమల్ హాసన్ నుంచి విడిపోతున్నట్లు ప్రకటించింది. తన జీవితంలో తీసుకున్న అత్యంత బాధాకరమైన నిర్ణయమిదని ఆమె ఆవేదన వ్యక్తం చేశారు. ఈ వార్త అటు కమల్ హాసన్, ఇటు గౌతమి అభిమానులను తీవ్రంగా కలిచి వేసింది.
