డైలాగ్ కింగ్ మోహన్ బాబు తనయుడు మంచు విష్ణు హీరోగా పరిచయమై పదిహేనేళ్ళు అవుతోంది. ఇప్పటికీ అతని ఖాతాలో “దూసుకెళ్తా” మినహా భారీ హిట్ లేదు. కొడుకులకు మంచి హిట్ ఇవ్వాలని మోహన్ బాబు గతంలో విష్ణు, మనోజ్ తో కలిసి కొన్ని సినిమాలు చేసినా ఫలితం లేదు. ఇప్పుడు మరో సారి గాయత్రి సినిమాలో కలిసి నటించారు. దీని ద్వారా హిట్ ట్రాక్ లోకి రావాలని విష్ణు చూస్తున్నారు. టీజర్, ట్రైలర్ తో సంచలనం సృష్టిస్తోన్న ఈ మూవీ ఫిబ్రవరి 9న ప్రేక్షకుల ముందుకు రాబోతోంది. ఆ తర్వాత మంచు విష్ణు సోలో హీరోగా నటించిన ఆచారి అమెరికా యాత్ర కూడా రిలీజ్ కావడానికి సిద్ధంగా ఉంది. ఈ రెండు సినిమాల రిజల్ట్ కి ముందే విష్ణు సంచలన నిర్ణయం తీసుకున్నారు. మెగా ఫోన్ అందుకోవడానికి రెడీ అయ్యారు.
తన దర్శకత్వంలో తానే నటించనున్నట్లు తెలిసింది. కథ కూడా ఒకే అయిందని, ఆచారి అమెరికా యాత్ర చిత్ర పనులు పూర్తి కాగానే స్క్రిప్ట్ పనుల్లో కూర్చోనున్నారు. తమిళంలో శింబు, ధనుష్ వంటి హీరోలు మెగా ఫోన్ పట్టుకుని తమ సినిమాలకు దర్శకత్వం వహించారు. తెలుగులో మహానటుడు ఎన్టీఆర్ డైరక్టర్ గా సక్సస్ అయ్యారు. పవన్ కళ్యాణ్ డైరక్టర్ గా ఓ సినిమా చేశారు. ఈ మధ్య పూరి జగన్నాధ్ తమ్ముడు సాయి రామ్ శంకర్ కూడా తాను నటించబోయే కొత్త సినిమాకు తానే దర్శకత్వం వహించడానికి రెడీ అవుతున్నారు. ఇప్పుడు మంచు విష్ణు కూడా ఆ జాబితాలో చేరబోతున్నారు. మరి విజయం అందుకుంటాడో.. లేదో.. చూడాలి.
Home