విజయ్ దేవరకొండకు మరో వారం కలిసొచ్చింది

విజయ్ దేవరకొండ అదృష్టమో లేక మాస్టర్ మైండ్ అల్లు అరవింద్ ప్లానింగ్ మహత్యమో తెలియడం లేదు కానీ మరొవారం వరకూ “గీత గోవిందం” కలెక్షన్స్ కు బ్రేక్ పడే ఛాన్స్ మాత్రం కనిపించడం లేదు. ఆగస్ట్ 15న “గీత గోవిందం” విడుదలవ్వగా.. ఆ తర్వాత వచ్చిన “ఝాన్సీ”, నిన్న విడుదలైన “నీవెవరో, అంతకుమించి, లక్ష్మీ, ఆటగాళ్లు” చిత్రాలలో ఏ ఒక్కటీ ప్రేక్షకుల్ని కనీస స్థాయిలో ఎంటర్ టైన్ చేసేలా లేకపోవడంతో ఈవారం కూడా ప్రేక్షకుల చూపు “గీత గోవిందం”పైనే ఉంది. అందుకే నిన్న నాలుగు కొత్త తెలుగు సినిమాలు విడుదలైనా కూడా “గీత గోవిందం” థియేటర్లు హౌస్ ఫుల్ కలెక్షన్స్ తో రన్ అవుతున్నాయంటే మామూలు విషయం కాదు.

ఇప్పటికే 75 కోట్ల గ్రాస్ కలెక్ట్ చేసిన “గీత గోవిందం” ఈవారం కూడా అదే ఊపులో హౌస్ ఫుల్ కలెక్షన్స్ తో ముందుకు సాగిందంటే.. వచ్చే శుక్రవారంలోపు 100 కోట్ల గ్రాస్ వసూలు చేయడం అనేది చాలా ఈజీ. అందుకేనేమో విజయ్ దేవరకొండ కూడా సైలెంట్ గా ప్రమోషన్స్ స్పీడ్ పెంచాడు. ఈ సినిమా గనుక 100 కోట్ల గ్రాస్ కలెక్ట్ చేసిందంటే మాత్రం 100 కోట్ల క్లబ్ లో స్థానం సంపాదించిన మొట్టమొదటి హీరోగా విజయ్ దేవరకొండ నిలిచిపోవడం ఖాయం.