అవకాశం వస్తే వదులుకోను..!

కనులు కనులను దోచాయంటే సినిమాతో తెలుగులో మంచి గుర్తింపుని స్టార్ హీరో ఇమేజ్ ని తెచ్చుకున్నాడు దుల్కర్ సల్మాన్. మహానటి సినిమాతోనే మంచి పేరు వచ్చింది. అయితే, కీర్తిసురేష్ డామినేట్ చేయడం, కీర్తి చుట్టూనే స్టోరీ తిరగడం అనేది దుల్కర్ కి ఆశించినంత పేరు తీసుకుని రాలేదు. కానీ, కనులు కనులను దోచాయంటే సినిమా మాత్రం మంచి సక్సెస్ ని అందుకుందనే చెప్పాలి. అందుకే , ప్రస్తుతం మరో తెలుగు సినిమా చేయడానికి గ్రీన్ సిగ్నల్ ఇచ్చాడు మనోడు. త్వరలో హనురాఘవపూడి చేయబోయే నెక్ట్స్ ప్రాజెక్ట్ లో హీరోగా యాక్ట్ చేయబోతున్నాడు. పూజహెగ్దే హీరోయిన్ గా నటిస్తున్న ఈ సినిమాలో దుల్కర్ క్యారెక్టర్ చాలా డిఫరెంట్ గా ఉంటుందని టాక్.

ఈ విషయం పక్కనబెడితే ఇప్పుడు దుల్కర్ సల్మాన్ ఒక మలయాళం మ్యాగ్జైన్ కి ఇంటర్య్వూ ఇస్తూ చెప్పిన మాటలు సోషల్ మీడియాలో హాట్ టాపిక్ గా మారాయి. తెలుగు బాష అంటే నాకు చాలా ఇష్టమని, మహానటి సినిమా చేసేటపుడు ప్రతి పదానికి అర్ధం తెలుసుకుని డబ్బింగ్ చెప్పానని అన్నాడు. అంతేకాదు, ఇప్పుడు కూడా స్వయంగా నా డబ్బింగ్ నేనే చెప్పానని ఎమైనా తప్పులుంటే క్షమించాలి అంటూ చాలా వినయంగా మాట్లాడాడు.

ఇక మీ నాన్నగారు మమ్ముట్టీ తీసిన మమంగం లాంటి చారిత్రాత్మకమైన సినిమాలు మీరు చేస్తారా అని అడిగితే, ఇప్పుడు ఈ జనరేషన్ కి తగిన సినిమాలు చేయనివ్వండి… కుర్రోళ్లకి కావాల్సిన సినిమాలు చేస్తున్నాను కదా దీంతోనే బిజీగా ఉన్నానని చెప్పాడు. అంతేకాదు, తెలుగులో అతి త్వరలోనే సినిమా చేస్తున్నానని అన్నాడు. ఇక జూనియర్ ఎన్టీఆర్ తో కలిసి యాక్ట్ చేసే అవకాశం వస్తే ఖచ్చితంగా చేస్తానని చెప్పుకొచ్చాడు ఈ యంగ్ హీరో. మహానటి లాంటి సినిమాలు తన దగ్గరకి మళ్లీ వస్తే ఖచ్చితంగా చేస్తానని, ఇంకా ఇప్పుడు మిగిలిన భాషల్లో 6 సినిమాలవరకూ కమిట్ అయ్యానని అన్నాడు దుల్కర్. దుల్కర్ కి ఎన్టీఆర్ పై ఉన్న అభిమానాన్ని ఫ్యాన్స్ తెగ షేర్లు చేస్తున్నారు. అదీ విషయం.