పెద్ద హీరోల సినిమాల వల్ల చిన్న సినిమాలకు థియేటర్లు దొరకడం లేదు.. అంటూ చాలా ఏళ్లుగా వింటూనే ఉన్నాం. పెద్ద హీరోల సినిమాలు వస్తే.. చిన్న సినిమాలు బాగా ఆడుతున్నా ఎత్తేస్తున్నారు అని చెప్పుకుంటూనే ఉన్నాం. ఈ సమస్యకు పరిష్కారం దొరక్క ఇప్పటికీ చిన్న నిర్మాతలు తలలు పట్టుకుంటుంటే.. ఇప్పుడు చిన్న సినిమాలకు, మధ్య స్థాయి సినిమాలకు మరో సమస్య వచ్చిపడిందా? గత రెండు రోజులుగా హైదరాబాద్‌లోని కొన్ని థియేటర్ల దగ్గర పరిస్థితి చూస్తుంటే అలానే అనిపిస్తోంది.
వినాయక చవితి, పవన్‌ కల్యాణ్‌ పుట్టిన రోజు దగ్గర దగ్గర రావడం, మహేష్ పుట్టిన రోజు సందర్భంగా మొదలైన ట్రెండ్‌ కారణంలో గత రెండు రోజులు, మరో రెండు రోజులు తెలుగు రాష్ట్రాల్లో పవన్‌ కల్యాణ్‌ సినిమాలు రీ రిలీజ్ అవుతున్నాయి. ‘తమ్ముడు’, ‘జల్సా’ సినిమాలను వివిధ థియేటర్లలో స్పెషల్‌ షోస్‌గా వేస్తున్నారు. నగరంలోని ముఖ్యమైన సింగిల్‌ స్క్రీన్స్‌లో ఈ సినిమాలు పడుతున్నాయి. అందులో తప్పేముంది అని అనుకుంటున్నారా? అక్కడ ఇప్పటికే ఆడుతున్న రెగ్యులర్‌ సినిమాల షోలు ఆపేశారు కాబట్టి.
ప్రస్తుతం థియేటర్లలో ‘సీతారామం’, ‘బింబిసార’, ‘కార్తికేయ 2’ ఆడుతున్నాయి. కొన్ని చోట్ల తప్పనిసరి పరిస్థితుల్లో ‘లైగర్’ వేస్తున్నారు. ‘జల్సా’, ‘తమ్ముడు’ కోసం ఆయా సినిమాలు షోలు ఆపేసి వేస్తున్నారు. అయితే దీని వల్ల థియేటర్లకు లాస్‌ ఏమీ లేదు. కానీ ఇలా ఆడుతున్న సినిమాలు ఎత్తేస్తే ఆ సినిమాల వసూళ్లు దెబ్బతింటాయి. అందులో వినాయకచవితి లాంటి పండగ సమయంలో మంచి వసూళ్లు వస్తాయి అనుకుంటుండగా ఇలా చేయడం ఏంటి అనే ప్రశ్న అక్కడక్కడా వినిపిస్తోంది.
ఐమ్యాక్స్‌ లాంటి మల్టిప్లెక్స్‌లోనూ ‘తమ్ముడు’, ‘జల్సా’ షోలే ఎక్కువగా పడ్డాయట. రెండు రోజుల్లోనే 30కిపైగా షోస్‌ వేశారు అని చెబుతున్నారు. ఈ ట్రెండ్‌ మొదలైంది మహేష్ సినిమాలతో అయినా.. పవన్‌ సినిమాలతో తారస్థాయికి చేరింది. ఒకవేళ ఈ ట్రెండ్‌ రెండు, మూడు రోజుల నుండి వారోత్సవాలు రేంజిలో ఏ వారమో, పది రోజులో జరిగితే కొత్త, చిన్న సినిమాలకు ఇబ్బందే కదా. మరోవైపు ప్రభాస్ ఫ్యాన్స్‌ అందరూ అక్టోబరు 23న ‘బిల్లా’కు భారీ స్థాయిలో షోస్‌ వేయించాలని చూస్తున్నారట. అప్పుడు కూడా ఇప్పటి పరిస్థితే వస్తుంది.
‘లైగర్’ లాంటి ఆడని సినిమాలు తీసేసి రీ రిలీజ్‌లు చేస్తే ఓకే.. కానీ బాగా ఆడుతున్న సినిమాలు తీసేస్తేనే ఇబ్బంది. కాబట్టి స్టార్లు, నిర్మాతలు, ఫ్యాన్స్‌ ఈ దిశగా కూడా ఆలోచించాలి.
Most Recommended Video
‘లైగర్’ కచ్చితంగా చూడడానికి గల 10 కారణాలు..!
మహేష్ టు మృణాల్.. వైజయంతి మూవీస్ ద్వారా లాంచ్ అయిన స్టార్ల లిస్ట్..!
‘తమ్ముడు’ టు ‘లైగర్’… బాక్సింగ్ నేపథ్యంలో రూపొందిన సినిమాల లిస్ట్..!
