రామలక్ష్మి టీజర్ వెనుక రామ్ చరణ్

చిత్ర పరిశ్రమలో మేల్ డామినేషన్ ఉందనేది ఎవరూ కాదనలేని నిజం. సినిమా కథ నుంచి.. కలక్షన్స్ వరకు అంతా హీరో చుట్టూనే తిరుగుతుంటుంది. ఇప్పటి వరకు స్టార్ హీరో సినిమా అనగానే.. ఆ మూవీ టీజర్, ట్రైలర్ లో హీరో క్యారెక్టర్స్ గురించే చూపిస్తుంటారు. ఈ టీజర్ సంస్కృతి మొదలైన తర్వాత తెలుగు చిత్ర పరిశ్రమలో తొలిసారి ఒక స్టార్ హీరో సినిమాలో హీరోయిన్ కోసం టీజర్ రిలీజ్ చేయడం అనేది రంగస్థలం విషయంలోనే జరిగింది. సుకుమార్ దర్శకత్వంలో తెరకెక్కిన ఈ సినిమాలో హీరో క్యారక్టర్ కి సంబంధించిన టీజర్ ని కొన్ని రోజుల క్రితం విడుదల చేశారు. సౌండ్ ఇంజినీర్ చిట్టిబాబుగా చెర్రీ కనిపించిన ఈ వీడియో విశేషంగా ఆకట్టుకుంది. నిన్న ఈ సినిమాలో సమంత పోషించిన రామలక్ష్మి టీజర్ ని రిలీజ్ చేశారు.

రామ్ చరణ్ వాయిస్ ఓవర్ తో సాగే ఈ వీడియో సినిమాపై అంచనాలను పెంచింది. ఈ విషయంపై సమంత ట్విట్టర్లో స్పందించింది. ‘‘ప్రత్యేకంగా హీరోయిన్‌పై టీజర్‌ని విడుదల చేయడం మాములు విషయం కాదు. ఇది సామాన్యంగా జరిగిందని అనుకోవడం లేదు. సుకుమార్‌తో కలిసి చరణ్‌ ఒత్తిడి చేయడం వల్లే ఇది జరిగిందనే విషయం నాకు తెలుసు. ఇది ఒక అందమైన ఆరంభంగా నేను భావిస్తున్నాను. ఇందుకు ప్రత్యేకంగా నా ధన్యవాదాలు తెలుపుకుంటున్నాను‌’’ అని సమంత ట్వీట్ చేశారు. ఈ విధానం రానున్న సినిమాలపై తప్పకుండా ప్రభావం చూపిస్తుంది. ఇక నుంచి హీరో, హీరోయిన్లకు టీజర్లు రావడం ఖాయమని సినీ విశ్లేషకులు అంచనా వేస్తున్నారు.