ఇప్పటికీ సినిమా పరిశ్రమ గురించి చెప్పాలి అంటే.. సినిమా రీల్ని వాడుతుంటారు. అవార్డులు, సినిమా విశ్లేషణలు చేసినప్పుడు ఆ రిలీని వాడుతుంటారు. అయితే అలాంటి రీల్ సినిమాల మేకింగ్ నుండి దూరమైందని తెలుసు. ఇప్పుడు సినిమాలు అన్నీ డిజిటల్ కెమెరాలతో తెరకెక్కినవే. ఖర్చు తగ్గించడం, పని సులువు అవ్వడం, టెక్నాలజీ వినియోగం లాంటి కారణాలతో ఫిల్మ్ కెమెరాల స్థానంలోకి డిజిటల్ కెమెరాలు వచ్చేశాయి. అయితే KHxRK సినిమా టీమ్ మాత్రం మాకు డిజిటల్ కెమెరాలు వద్దు అంటోంది.
అవును, మీరు చదివింది కరెక్టే. కమల్ హాసన్ – రజనీకాంత్ కలసి 47 ఏళ్ల తర్వాత నటిస్తున్న ఈ సినిమా కోసం దర్శకనిర్మాతలు, సినిమాటోగ్రాఫర్ కీలక నిర్ణయం తీసుకున్నారట. దాని ప్రకారం ఈ సినిమా షూటింగ్లో ఫిల్మ్ని వాడబోతున్నారట. ఇదేంటి ఇంత టెక్నాలజీ వచ్చాక ఇంకా ఫిల్మ్ ఎందుకు అనుకుంటున్నారా? మీరు చెప్పింది నిజమే కానీ.. ఈ సినిమా మరింత ప్రత్యేకం చేయాలని దర్శకుడు నెల్సన్ దిలీప్ కుమార్, నిర్మాత ఉదయనిధి స్టాలిన్, సినిమాటోగ్రాఫర్ రాజీవ్ మేనన్ అనుకున్నారని సమాచారం.
నిజానికి సినిమా అనౌన్స్మెంట్ గ్లింప్స్ని కూడా ఫిల్మ్ కెమెరాతో తెరకెక్కించాలని అనుకున్నారట. అయితే సమయాభావం వల్ల డిజిటల్ కెమెరా వాడారు అని సమాచారం. సినిమా నేపథ్యం ఇదీ అని చెప్పడం లేదు కానీ రెట్రో లుక్ అయితే ఉంటుందని టాక్. ఆ ఫీల్ కోసం ఫిల్మ్ కెమెరా వాడుతున్నారు అని తెలుస్తోంది. ఇక ఈ సినిమాను పూర్తి స్థాయి వినోదాత్మకంగా రూపొందించాలని అనుకుని కథ లైన్ను చెప్పారు నెల్సన్. ఇప్పుడు దానిని పూర్తి స్థాయిలో డెవలప్ చేసే పనిలో ఉన్నారు.
ఈ సినిమా చిత్రీకరణ వచ్చే ఏడాది ప్రారంభమవుతుంది. ప్రస్తుతం కమల్, రజనీ చేస్తున్న సినిమాల పనులు అన్నీ అయిపోయాక ఈ సినిమా మొదలుపెడతారట. రజనీకాంత్ 173వ సినిమా చిత్రీకరణ త్వరలో మొదలవుతుంది. కమల్ హాసన్ చేతిలో ‘కల్కి 2’ ఉంది. ఈ సినిమా చిత్రీకరణ హైదరాబాద్లో ఇటీవల మొదలైంది. అలాగే అన్బరివ్ ద్వయం దర్శకత్వంలో ఓ సినిమాను ఇటీవల స్టార్ట్ చేశారు.
