రైతు సమస్యలపై దృష్టిపెట్టిన మహేష్, వంశీ

సూపర్ స్టార్ మహేష్ బాబు కొరటాల శివ దర్శకత్వంలో చేసిన భరత్ అనే నేను సినిమా సంచలన విజయం సాధించింది. ఈ చిత్రం తర్వాత మహేష్… వంశీ పైడి పల్లి దర్శకత్వంలో నటించనున్నారు. ఈ మూవీకి ఏడాది క్రితమే కథని సిద్ధం చేసిన డైరక్టర్ ఈ నెల నుంచి పట్టాలెక్కించడానికి సిద్ధంగా ఉన్నారు. ఎక్కువగా అమెరికాలో సాగే ఈ చిత్రంలో అల్లరి నరేష్ నటిస్తున్న సంగతి తెలిసిందే. మహేష్, నరేష్ మధ్య కృష్ణుడు-కుచేలుడు తరహాలో స్నేహం ఉంటుందంట. అలా స్నేహితుడి ద్వారా తెలుగు రాష్ట్రాల్లో రైతుల కష్టాలు తెలుసుకున్న మహేష్.. వాటిని తొలగించడానికి వినూత్నమైన పథకాలను అమలు చేయడమే స్టోరీ లైన్ అని సమాచారం. డైరక్టర్ వంశీ పైడిపల్లి, నిర్మాత దిల్ రాజు లు తెలంగాణలో రైతుల కష్టాలను క్షుణ్ణముగా పరిశీలించి ఈ స్టోరీ సిద్ధం చేసారంట.

అయితే వారు కథ సిద్ధం చేసినప్పుడు, ఇప్పటికీ తెలంగాణ రైతుల జీవితాల్లో మంచి మార్పులు వచ్చాయి. సో ఇదివరకటి లాగా రైతుల కష్టాలు చూపిస్తే కేసీఆర్ ప్రభుత్వ ఆగ్రహానికి చిత్ర బృందం గురికావాల్సి ఉంటుంది. అందుకే కథలో మార్పులు చేస్తున్నట్టు చెప్పుకుంటున్నారు. ఇందులో ప్రధాన హీరోయిన్ గా డీజే బ్యూటీ పూజా హెగ్డే ఖరారు కాగా, ‘అర్జున్‌రెడ్డి’ భామ షాలిని పాండే అల్లరి నరేష్ కి జోడీగా నటించనుంది. మహేష్ కెరీర్ లో కీలకమైన ఈ చిత్రానికి రాక్ స్టార్ దేవీ శ్రీ ప్రసాద్ మ్యూజిక్ అందించనున్నారు. రైతుల సబ్జెట్ మహేష్ కి బాగా కలిసి వచ్చింది. సో ఈ మూవీ కూడా భారీ విజయాన్ని అందిస్తుందని ఫ్యాన్స్ భావిస్తున్నారు.