తన తండ్రి జీవితాన్ని నేటి ప్రజలకు చూపించాలని బాలకృష్ణ ఎంతలా ఆశపడుతున్నారో.. అంతకన్నా ఎన్నో రెట్లు ఈ చిత్రం బాగా రావాలని క్రిష్ ఆరాటపడుతున్నారు. ఈ చిత్రం కోసం తన వ్యక్తిగత, వృత్తిగత జీవితాల్లో ఎన్ని ఇబ్బందులు ఎదురైనప్పటికీ ఏకాగ్రతను కోల్పోవడం లేదు. వేగంగా షూటింగ్ చేస్తున్నారు. తన అన్న హరికృష్ణ చనిపోయినప్పటికీ.. ఆ బాధని గొంతులోనే దిగమింగుకొని బాలయ్య నటిస్తున్నారు. ప్రస్తుతం ఎన్టీఆర్ ముఖ్యమంత్రిగా అసెంబ్లీ లో అడుగుపెట్టే సన్నివేశాలను తెరకెక్కిస్తున్నారు. ఈ మూవీ గురించి ఆసక్తికర విషయం బయటికి వచ్చింది. ఇందులో మెగా బ్రదర్.. ఎస్ వి రంగారావు పాత్రను పోషిస్తున్నట్టు తెలిసింది.
ఇప్పటికే ఇందులో ఎక్కువమంది ప్రముఖ నటీనటులు నటిస్తున్నారు. ఎన్టీఆర్ గా బాలకృష్ణ నటిస్తున్న ఇందులో ఎన్టీఆర్ భార్య బసవతారకం పాత్రని బాలీవుడ్ హీరోయిన్ విద్యాబాలన్ పోషిస్తోంది. అక్కినేని నాగేశ్వరరావ్ పాత్రలో సుమంత్, ఎన్టీఆర్ అల్లుడు, నేటి ముఖ్యమంత్రి అయిన నారా చంద్రబాబు నాయుడుగా దగ్గుబాటి రానా కనిపించనున్నారు. అలాగే యువ బాలకృష్ణగా మోక్షజ్ఞ మెరవనున్నారు. కొర్రపాటి, విష్ణు ఇందూరిలతో కలిసి బాలయ్య నిర్మిస్తున్న ఈ మూవీ సంక్రాంతి కానుకగా జనవరి 9న థియేటర్లోకి రానుంది. సావిత్రి బయోపిక్ మహానటి కమర్షియల్ గా హిట్ కావడంతో.. ఎన్టీఆర్ బయోపిక్ కూడా కాసులు కురిపిస్తుందని సినీ విశ్లేషకులు భావిస్తున్నారు.
Home