‘ఎవడే సుబ్రమణ్యం’ మొదలు ఎడతెరిపి లేకుండా సినిమాలు చేసేస్తున్నాడు యువ కథానాయకుడు నాని. ఫలితంగా అవన్నీ వరస కట్టి వెండి తెరనాక్రమించి ప్రేక్షకులతో విజిల్స్ కొట్టిస్తున్నాయి. ‘ఎవడే సుబ్రహ్మణ్యం’ తర్వాత ‘జెంటిల్ మన్’తో వరుసగా నాలుగు విజయాలు అందుకున్న నాని తాజాగా ‘మజ్ను’గా అలరించనున్న సంగతి తెలిసిందే. నాని సినిమా అంటేనే హాస్యం పులుముకుని ఉంటుంది. అలాంటిది ‘మజ్ను’ లాంటి విషాదం నిండిన టైటిల్ పెట్టడంతో కథ ఏమై ఉంటుందా అన్న ఆసక్తి సినీ ప్రియుల్లో మొదలైంది. అయితే వారి ఎదురుచూపులు మరోవారం అదనంగా పొడిగించుకోవాల్సిందేనట.
‘ఉయ్యాలా.. జంపాల’ దర్శకుడు విరించి వర్మ తెరకెక్కించిన ‘మజ్ను’ చిత్రం ఈ నెల 16 విడుదలవుతోందని తొలుత అనుకున్నారు. తెలియవస్తున్న సమాచారం ప్రకారం మజ్ను 23న తెరపైకి వస్తాడట. ఆ లెక్కన ‘మజ్ను’ కోసం కళ్ళల్లో ఒత్తులేసుకుని ఎదురుచూస్తున్న వారంతా మరో వారానికి సరిపడా జమ చేసుకోవలసిందే. పోతే.. గోపి సుందర్ పాటలు, ట్రైలర్ తో వచ్చిన పాజిటివ్ టాక్ సినిమాకి కొనసాగుతుందని నిర్మాతలు నమ్మకంగా ఉన్నారు. ఇదిలా ఉంటే నాని ప్రస్తుతం త్రినాధరావు నక్కిన దర్శకత్వం వహిస్తోన్న ‘నేను లోకల్’ సినిమాలో నటిస్తున్నాడు.
Home