కొన్నేళ్ల కిందట నయనతార నటనకి ఎండ్ టైటిల్ పడ్డట్టే అనుకున్నారంతా. అనతికాలంలోనే అనూహ్యంగా రీ ఎంట్రీ ఇచ్చిన నయన్ మునుపటి కంటే బిజీ హీరోయిన్ గా మారి హీరోయిన్లందరికీ పోటీ ఇస్తోంది. నెం 1 అని చెప్పాల్సివస్తే గనక ఇప్పటికీ నయన్ పేరే ముందుంటుంది. తెలుగులో తగ్గించినా తమిళనాట వరుస సినిమాలు చేస్తున్న నయనతార సూర్య హీరోగా విఘ్నేష్ శివన్ తెరకెక్కించనున్న సినిమాలో నటిస్తుందంటూ వార్తల్లోకి వచ్చింది. ఆ వేడి చల్లారకముందే మహేశ్ సినిమాలో తళుక్కున మెరవనుందని చెన్నై వర్గాలు సడి చేస్తున్నాయి.
విభిన్న కథలను స్పృశించే మురుగదాస్ దర్శకుడిగా మహేశ్ ఓ సినిమా చేస్తోన్న సంగతి తెలిసిందే. తమిళ, తెలుగు భాషల్లో తెరకెక్కుతోన్న ఈ సినిమాలో మహేశ్ సరసన నాయికగా రకుల్ ఎంపికైంది. అయితే సినిమాలో వచ్చే ఫ్లాష్ బ్యాక్ ఎపిసోడ్ లో నయనతార ఓ ముఖ్య పాత్ర పోషిస్తోందట. ఇదే జరిగితే మహేశ్-నయనతార కాంబినేషన్ లో ఇదే తొలి సినిమా అవుతుంది. కాగా మురుగదాస్ తో నయన్కిది రెండోది. ఇదిలా ఉంటే తమిళ, తెలుగు భాషల్లో ఒకే టైటిల్ పెట్టేందుకు చిత్ర బృందం నిర్ణయించిందట.
