పుష్ప 2 (Pushpa 2) సినిమా ప్రీమియర్ షో సందర్భంగా సంధ్య థియేటర్ వద్ద జరిగిన తొక్కిసలాట ఘటన అందరికీ ఆవేదన కలిగించింది. ఈ దురదృష్టకర సంఘటనలో రేవతి అనే మహిళ మరణించగా, ఆమె కుమారుడు శ్రీతేజ్ తీవ్రంగా గాయపడ్డాడు. ప్రస్తుతం శ్రీతేజ్ వైద్యుల పర్యవేక్షణలో చికిత్స పొందుతూ కోలుకుంటున్నాడు. ఈ నేపథ్యంలో అల్లు అర్జున్ (Allu Arjun) స్వయంగా ఆసుపత్రికి వెళ్లి శ్రీతేజ్ని పరామర్శించాడు. ఇక లేటెస్ట్ గా, ఈ విషాదకర ఘటనపై మెగా డాటర్ నిహారిక (Niharika) తన అభిప్రాయాన్ని పంచుకున్నారు.
తన తమిళ చిత్రం ‘మద్రాస్ కారన్’ ప్రమోషన్ సందర్భంగా నిహారిక ఓ ఇంటర్వ్యూలో మాట్లాడుతూ, ఈ సంఘటనతో అల్లు అర్జున్ తీవ్ర మానసిక వేదనలో ఉన్నారని తెలిపారు. తన ఫ్యామిలీకి చెందిన అల్లు అర్జున్ ఈ బాధ నుంచి ఇప్పుడిప్పుడే బయటపడుతున్నారని ఆమె అన్నారు.”ఒకరి ప్రాణం కోల్పోవడం ఎంతో బాధను కలిగించే విషయం. అలా జరగాలని ఎవరూ కోరుకోరు. ఈ సంఘటన బన్నీ అన్నయ్యకు తీవ్రమైన ఆందోళనను కలిగించింది.
ఆయన మామూలు జీవితానికి తిరిగి రావాలని కోరుకుంటున్నాను,” అంటూ నిహారిక భావోద్వేగంతో మాట్లాడారు. అల్లు అర్జున్ బాధతో పాటు, ఈ ఘటన వల్ల వారి కుటుంబం మొత్తం బాధపడిందని నిహారిక అన్నారు. ఇకపోతే, పుష్ప 2 బాక్సాఫీస్ వద్ద అత్యధిక వసూళ్లు సాధిస్తూ భారీ విజయాన్ని నమోదు చేసుకుంది.
ప్రపంచవ్యాప్తంగా పుష్ప 2 ఇప్పటికే బాహుబలి 2 రికార్డును బ్రేక్ చేసింది. సినిమా యూనిట్ 20 నిమిషాల అదనపు చిత్రాన్ని పుష్ప రీ లోడెడ్ పేరుతో విడుదల చేయడం, ప్రేక్షకులలో మరింత ఉత్సాహం నింపింది. దంగల్ రికార్డును అధిగమించడానికి ఈ సినిమా ప్రయత్నం చేస్తోందని ట్రేడ్ వర్గాలు అభిప్రాయపడుతున్నాయి.
