కన్నడ స్టార్ హీరో రాకింగ్ స్టార్ యష్ నటిస్తున్న భారీ చిత్రం ‘టాక్సిక్’ పై ప్రేక్షకుల్లో భారీ అంచనాలు నెలకొన్నాయి. ప్రముఖ దర్శకురాలు గీతూ మోహన్ దాస్ దర్శకత్వంలో తెరకెక్కుతున్న ఈ సినిమా, యష్ కెరీర్లో అత్యంత ప్రతిష్టాత్మక ప్రాజెక్ట్లలో ఒకటిగా భావిస్తున్నారు. ముఖ్యంగా కేజీఎఫ్ 2 తర్వాత యష్ నుంచి వస్తున్న సినిమా కావడంతో అభిమానులు ఈ మూవీ కోసం ఎంతో ఆసక్తిగా ఎదురుచూస్తున్నారు.
మొదటగా ఈ సినిమాను ఉగాది, రంజాన్ పండుగల సందర్భంగా మార్చి 19న ప్రపంచవ్యాప్తంగా విడుదల చేయాలని మేకర్స్ ప్లాన్ చేశారు. ఇప్పటికే విడుదలైన టీజర్, ప్రచార కంటెంట్ సినిమాపై మంచి హైప్ తీసుకొచ్చాయి. అయితే ప్రస్తుతం ప్రపంచవ్యాప్తంగా ఏర్పడిన కొన్ని పరిస్థితుల కారణంగా చిత్ర విడుదలను వాయిదా వేయాలని చిత్రబృందం నిర్ణయించింది.
ప్రత్యేకంగా నెలకొన్న యుద్ధ వాతావరణం, ఉద్రిక్త పరిస్థితులు, ఓవర్సీస్ మార్కెట్పై ప్రభావం చూపే అవకాశం ఉందని మేకర్స్ భావించారు. ప్రపంచవ్యాప్తంగా ఎక్కువ మంది ప్రేక్షకులకు సినిమా చేరాలనే ఉద్దేశంతోనే ఈ నిర్ణయం తీసుకున్నట్లు చిత్రబృందం తెలిపింది. అంతేకాకుండా ఇతర పెద్ద సినిమాల విడుదలలు కూడా సమీపంలో ఉండటంతో సరైన సమయాన్ని ఎంచుకోవాలనే ఆలోచన కూడా ఉన్నట్లు తెలుస్తోంది.
దీంతో ‘టాక్సిక్: ఎ ఫెయిరీ టేల్ ఫర్ గ్రోన్-అప్స్’ సినిమాను ఇప్పుడు జూన్ 4, 2026న ప్రపంచవ్యాప్తంగా విడుదల చేయాలని నిర్ణయించారు. కన్నడతో పాటు ఇంగ్లీష్ మరియు ఇతర భారతీయ భాషల్లో ఈ సినిమా విడుదల కానుంది. భారీ స్థాయిలో రూపొందుతున్న ఈ చిత్రంతో యష్ మరోసారి పాన్-ఇండియా స్థాయిలో ప్రేక్షకులను అలరించనున్నాడా అన్నది ఆసక్తిగా మారింది. కాగా ఈ ఉద్రిక్త పరిస్థితుల వలన విడుదలకు సిద్ధంగా ఉన్న చిత్రాల మేకర్స్ కూడా ఆందోళనలో పడ్డారు.
