ఐరన్ లెగ్ అనే పేరుని గోల్డెన్ లెగ్ గా మార్చింది పవన్ కళ్యాణ్

వివిధ రంగాల్లో కంటే సినీ ఫీల్డ్ లో సెంటిమెంట్ పాలు ఎక్కువ. ఒక సారి హిట్ అయితే ఆ కాంబినేషన్ పై సినీజనాల్లో విపరీతమైన నమ్మకం ఉంటుంది. అదే విధంగా ఫెయిల్ అయితే ఆ చిత్రానికి పనిచేసిన వారిపై చెడు అభిప్రాయం ఏర్పడుతుంది. ఐరన్ లెగ్ అని ముద్ర వేసేస్తారు. ఆ పేరుతో ఇబ్బందిపడిన వారిలో శృతిహాసన్ ఒకరు. లక్ చిత్రం ద్వారా బాలీవుడ్ కి పరిచయమైన కమలహాసన్ కుమార్తె హిట్ అందుకోలేక పోయింది. అక్కడ ఎంట్రీ బాగాలేదని తెలుగులో అనగనగా ఒక ధీరుడు చిత్రం తో పలకరించింది. ప్చ్ .. లాభం లేకపోయింది. ఆ చిత్రం ఘోరంగా ఫెయిల్ అయింది. ఈ సారి తమిళ పరిశ్రమకు బయలు దేరింది. అక్కడ సూర్యతో కలిసి సెవెన్త్ సెన్స్ మూవీలో నటించింది. ఎన్నో అంచనాలతో విడుదలయిన ఈ మూవీ బాక్స్ ఆఫీస్ వద్ద బోల్తా పడింది. దీంతో ఆమెకు ఐరెన్ లెగ్ అనే ముద్రను వేశారు.

ఆతర్వాత చేసిన ఓ మై ఫ్రెండ్, త్రీ సినిమాలు అడ్రస్ లేకుండా పోయాయి. దీంతో శృతి కూడా చాలా అప్సెట్ అయింది. నిర్మాతలు ఆమెను సంప్రదించడం ఆపేసారు. అటువంటి పరిస్థితుల్లో పవన్ కళ్యాణ్ తన గబ్బర్ సింగ్ సినిమాలో అవకాశం ఇచ్చారు. ఆ చిత్రం శృతి పై ఉన్న అపవాదుని తొలిగించింది. ఇద్దరికీ మంచి పేరుని తీసుకొచ్చింది. ఆ తర్వాత శృతి కి ఆఫర్లతో పాటు విజయాలు పలకరించాయి. ఎవడు, రేసుగుర్రం, శ్రీమంతుడు వంటి బ్లాక్ బస్టర్ లను తన ఖాతాలో వేసుకుంది. ఈ విషయాన్నీ శృతిహాసన్ రీసెంట్ గా ఓ ఇంటర్వ్యూలో వెల్లడించింది. “నాకున్న ఐరన్ లెగ్ అనే పేరుని గబ్బర్ సింగ్ సినిమాతో పవన్ కళ్యాణ్ గోల్డెన్ లెగ్ గా మార్చారు” అని వెల్లడించింది. ఈ హిట్ పెయిర్ మరో సారి కాటమరాయుడు రూపంలో విజయాన్ని అందుకోబోతోంది.

https://www.youtube.com/watch?v=7_p9W6VH5ew