మరో మాస్ సాంగేసుకున్న పవన్ కళ్యాణ్!

పవన్ కళ్యాణ్ డైలాగ్ చెప్తే, డ్యాన్స్ చేస్తే యూత్ రెచ్చిపోతారన్న విషయం తెలిసిందే. అయితే.. అదే పవన్ కళ్యాణ్ పాట పాడితే రెస్పాన్స్ ఎలా ఉంటుందో “జానీ” సినిమాలోనే చూశాం. ఈ సినిమాలో ఆయన “నారాజుగాకురా మా అన్నయ్య” అనే పాట పాడడమే కాక ఆ పాటలో నర్తించినప్పుడు థియేటర్స్ మొత్తం ఊగాయి. మళ్ళీ అదే తరహాలో ఇటీవల “అత్తారింటికి దారేది” చిత్రంలోనూ “బేట్రాయి సామి దేవుడా” అనే ఉరమాస్ సాంగ్ పాడి అభిమానుల్ని ఆశ్చర్యపరిచాడు. మళ్ళీ చాన్నాళ్ల తర్వాత మరోమారు మైక్ అందుకొన్నాడు పవన్ కళ్యాణ్.

త్రివిక్రమ్ దర్శకత్వంలో తెరకెక్కుతున్న “అజ్నాతవాసి”లో పవన్ ఓ పాట పాడాడట. అనిరుధ్ సంగీత సారధ్యంలో రూపొందుతున్న ఈ చిత్రంలో “కొడకా కోటేశ్వర్రావా” అనే పాట పాడాడట. ఇటీవల బల్గేరియా షెడ్యూల్ పూర్తి చేసుకొని హైద్రాబాద్ వచ్చిన పవన్ కళ్యాణ్ సాంగ్ రికార్డింగ్ పూర్తి చేశాడట. “బేట్రాయిసామి దేవుడా” కంటే సూపర్ హిట్ అయ్యే రేంజ్ లో ఈ కొత్తపాట “కొడకా కోటేశ్వర్రావు” ఉండబోతోందట. త్రివిక్రమ్ అయితే రికార్డింగ్ అయినప్పట్నుంచి పాట వింటూనే ఉన్నాడట. ఇక పవన్ కళ్యాణ్ ఫ్యాన్స్ అయితే ఈ పాట విని పెచ్చెక్కిపోవాల్సిందే అంటున్నారు ఇన్సైడ్ సోర్సస్.