టైటిల్ తో పాటు సాంగ్ ని రిలీజ్ చేయనున్న పవన్ కళ్యాణ్ చిత్ర బృందం!

డైరక్టర్ త్రివిక్రమ్ శ్రీనివాస్ తో పవర్ స్టార్ పవన్ కళ్యాణ్ చేస్తున్న సినిమా షూటింగ్ వేగంగా జరుగుతోంది. పవన్ సాఫ్ట్ వేర్ ఇంజినీర్ గా నటిస్తున్న ఈ మూవీలో హీరోయిన్లుగా అను ఇమ్మానియేల్, కీర్తి సురేష్ నటిస్తున్నారు. సీనియర్ నటి కుష్బూ కీలకరోల్ పోషిస్తోంది. విక్టరీ వెంకటేష్ గెస్ట్ రోల్ చేస్తున్న ఈ సినిమాకి  అజ్ఞాతవాసి అనే టైటిల్ ప్రచారంలో ఉంది. ఇది నిజమో కాదో కొన్ని రోజుల్లో తెలిసిపోనుంది.  త్రివిక్రమ్ పుట్టినరోజు సంధర్బంగా ఈనెల (నవంబర్) 7 న టైటిల్ ని చిత్ర యూనిట్ ప్రకటించనుంది. అంతేకాదు అదే రోజు “బైటి కొచ్చి చూస్తే..” అనే పాటను విడుదల చేయనున్నట్టు ఈ రోజు స్పష్టం చేసింది.

అనిరుద్ కంపోజ్ చేసిన ఈ పాట టీజర్ ని పవన్ పుట్టినరోజున రిలీజ్ చేసిన సంగతి తెలిసిందే. ఈ ట్యూన్ యువతని చాలా ఆకట్టుకుంది. ఇప్పుడు పూర్తి పాటని విననున్నారు. హారిక హాసిని క్రియేషన్స్ బ్యానర్లో రాధాకృష్ణ నిర్మిస్తున్న ఈ మూవీని  సంక్రాంతి కానుకగా జనవరి 10 న రిలీజ్ చేయనున్నారు. జల్సా, అత్తారింటికి దారేది కాంబినేషన్లో వస్తున్న ఈ చిత్రంపై భారీ అంచనాలున్నాయి.