మహేశ్, ఎన్టీఆర్ లతో పూరి సినిమాలు డౌటే..?

‘జనగణమన’ సినిమాతో పూరి, మహేశ్ హ్యాట్రిక్ కొడతారని అందరూ అనుకుంటుండగా సడెన్ గా పూరి ఓ బాంబు పేల్చారు. అప్పట్లో మహేశ్ ని దృష్టిలో పెట్టుకుని ఈ కథ సిద్ధం చేసిన పూరి వెంటనే సూపర్ స్టార్ కి వినిపించారట. ప్రిన్స్ కూడా బాగుందనడంతో పూరి విషయాన్ని బయటికొదిలేశాడు. తర్వాత ఇప్పటివరకు మహేశ్ ఆ కథ గురించి మాట మాత్రంగానైనా నోరు మెదపడం లేదట. ప్రస్తుతం మురుగదాస్ తో చేస్తున్న ద్విభాషా చిత్రం పూర్తి కాగానే మహేశ్ ‘జనగణమన’ సినిమాని సెట్స్ మీదికి తీసుకెళ్తాడని నిన్నటిదాకా ప్రచారం జరుగగా ఇప్పుడు సినిమా ఉన్నట్టా.. లేనట్టా? అన్న ప్రశ్న మొదలైంది.

అన్నట్టు ఈ సినిమా కథాంశాన్ని పూరి కొంత లీక్ చేశారు. ఈ మధ్యకాలంలో పూరి తెరకెక్కించిన కథల్లో ఏదో ఒక సామాజికాంశం కనపడుతూనే ఉంది. తాజాగా రూపొందించిన ‘ఇజం’ సినిమాని జర్నలిజం నేపథ్యం నడుస్తుందన్న పూరి ‘జనగణమన’ తాను సమాజాన్ని చూసే కోణం తెలుస్తుందన్నారు. ‘క్రమశిక్షణ’ అనే అంశాన్ని ‘జనగణమన’లో ప్రస్తావించనున్నారట. వ్యక్తిగత క్రమశిక్షణ తప్పడం వల్లే వ్యవస్థ చిన్నాభిన్నం అవుతుందన్నది కథ. మహేశ్ కి ‘శ్రీమంతుడు’తో బ్లాక్ బస్టర్ ఇచ్చిన కొరటాల శివతో చేయనున్న కథ కూడా ఇదే తరహాలో ఉంటుందట. దాంతో మహేశ్ ‘ఏం చేయాలా..?’ అన్న డైలమాలో పడ్డాడు కాబోలు. గమనించదగ్గ విషయం ఏమిటంటే.. బాల్ మహేష్ కోర్ట్ లోనే వదిలేశాడు పూరి. సో ఈ సినిమా గురించి ఇక ఏదైనా తెలియాలంటే అది మహేష్ నుండి రావాల్సిందే.

అటు ఎన్టీఆర్ సినిమా పైన పూరి పెదవి విప్పారు. హ్యాట్రిక్ హిట్స్ తో జోరు మీదున్న ఎన్టీఆర్ తనకు ‘టెంపర్’ లాంటి హిట్ ఇచ్చిన పూరితోనే తర్వాతి సినిమా చేస్తారన్న ప్రచారం జరుగుతున్నా సంగతి తెలిసిందే. ఎన్నో అంచనాల మధ్య విడుదలవుతోన్న ‘ఇజం’ తర్వాత పూరి ఎన్టీఆర్ తో సినిమా చేస్తారని నందమూరి అభిమానులు అనుకుంటుండగా ఆ సినిమా ఖరారు కాలేదని వారికి నిరాశ మిగిల్చారు. ఇదిలా ఉంటే పూరి సినిమాలతో స్టార్ స్టేటస్ పొందిన రవితేజతో ఓ సినిమా చేసే ఆలోచన ఉందని చెప్పాడు పూరి. అయితే రవితేజ చేతిలో సినిమాలు లేవు గనక ఇతగాడు జాలీగా దేశాలన్నీ చుట్టేస్తున్నాడు. అక్కడితో ఆగక పదిహేనేళ్ళ నుండి విశ్రాంతి లేకుండా సినిమాలు చేస్తూనే ఉన్నాం. ఇక వాటిని వదిలేసి రమ్మని పూరీని కూడా పోరు పెడుతున్నాడట. మరి రవితేజ మాట ప్రకారం పూరి విదేశాల్లో ఊరేగుతారా లేక రవితేజని తీసుకొచ్చి మళ్ళీ సినిమాల్లో బిజీ అయ్యేలా చేస్తారా అన్నది తేలాల్సుంది.