రకుల్ రెమ్యూనరేషన్ తగ్గిస్తుందేమో చూడాలి!

“లౌక్యం” అనంతరం స్టార్ హీరోయిన్ గా ఎదిగిన రకుల్ అనంతరం రామ్ చరణ్, ఎన్టీయార్, అల్లు అర్జున్, మహేష్ బాబు, రవితేజ లాంటి స్టార్ హీరోల సరసన నటించే అవకాశాలు సొంతం చేసుకొని మంచి ఫామ్ లో ఉన్న రకుల్ కెరీర్ ని “స్పైడర్” బాక్సాఫీస్ రిజల్ట్ తారుమారు చేసింది. ఒక్కసారిగా రకుల్ ను క్యాస్ట్ చేసుకోవాలంటే దర్శకనిర్మాతలు భయపడే పరిస్థితి ఏర్పడింది. అందులోనూ రకుల్ దాదాపు కోటి రూపాయలు రెమ్యూనరేషన్ చార్జ్ చేయడం కూడా అందుకు కారణం.

అయితే.. ఇప్పుడు రకుల్ కి తెలుగులో అవకాశాలు లేవు. పైగా.. హిందీలో బోలెడు ఆశలు పెట్టుకున్న “అయ్యారి” డిజాస్టర్ అవ్వడంతో రకుల్ బాలీవుడ్ మీద ఎక్కువ హోప్స్ పెట్టుకోకుండా తమిళంలో ఇమ్మీడియట్ గా రెండు సినిమాలు సైన్ చేసింది. తెలుగులో మాత్రం కొత్త అందాల భామల తాకిడి వల్ల పెద్దగా ఆఫర్లు దక్కించుకోలేక ఇబ్బందిపడుతోంది. అందుకే అర్జెంట్ గా ఒక మంచి తెలుగు సినిమా సైన్ చేయమని తన మేనేజర్ టీం కి గట్టిగా హుకూం జారీ చేసిందట రకుల్ ప్రీత్. మేడంగారు ఆర్డర్ ఇవ్వడంతో మేనేజర్ టీం మంచి ప్రొజెక్ట్ సైన్ చేయించేందుకు ప్రొడక్షన్ ఆఫీసుల చుట్టూ తిరుగుతున్నారు.