“రంగ రంగ రంగస్థలాన” సాంగ్ మేకింగ్ వీడియో రిలీజ్ చేసిన చిత్ర బృందం!

మెగా పవర్ స్టార్ రామ్‌చరణ్‌, దర్శకుడు సుకుమార్‌ల కలయికలో తెరకెక్కిన చిత్రం చిత్రం రంగస్థలం.  చిట్టిబాబు పాత్ర‌లో రామ్ చ‌ర‌ణ్, రామ‌ల‌క్ష్మీగా స‌మంత పాత్ర‌ల‌ను ప‌రిచ‌యం చేస్తూ విడుదలయిన ఈ మూవీ టీజర్స్, ట్రైలర్ సినిమాపై అంచనాలను పెంచివేశాయి. ముఖ్యంగా రాక్ స్టార్ దేవీ శ్రీ ప్రసాద్ కంపోజ్ చేసిన పాటలు మాస్ ప్రేక్షకులను ఉర్రూతలూగిస్తున్నాయి. యూట్యూబ్ లో అత్యధిక వ్యూస్ అందుకుంటున్నాయి. ఇక తాజాగా ఈ మూవీలోని “రంగ.. రంగ.. రంగస్థలానా” సాంగ్ మేకింగ్ వీడియోను ఈరోజు సాయంత్రం నాలుగు గంటలకు చిత్ర యూనిట్ విడుదల చేసింది.

గోదావరి తీరాన ఈ పాట కోసం వేసిన సెట్.. ఆ సెట్ వేయడం వెనుక ఎంతమంది కష్టం దాగుందో ఈ వీడియోలో కనిపించింది. అలాగే రెండు నిమిషాల వ్యవధి గల ఈ వీడియోలో కొరియోగ్రాఫర్ ప్రేమ్ రక్షిత్.. రామ్ చరణ్ తో  స్టెప్పులు ఎలా వేయించారో అర్ధమవుతోంది. అంతేకాదు చరణ్ ని చూసేందుకు తరలివచ్చిన అభిమానులను కూడా ఇందులో చూడవచ్చు.  మైత్రీ మూవీ మేకర్స్ పతాకంపై నవీన్ ఎర్నేని, వై.రవిశంకర్, మోహన్ (సి.వి.ఎమ్) నిర్మించిన ఈ మూవీ మార్చి 30న ప్రపంచవ్యాప్తంగా విడుదల కానుంది.