కొన్ని జ్ఞాపకాలు మంచివి అయినా.. చెడు అయినా మనల్ని వెంటాడుతూనే ఉంటాయి. అటువంటి వాటిలో ఖుషి సినిమా ఒకటి. ఎస్.జే సూర్య దర్శకత్వం వహించిన ఈ సినిమా పేరు చెప్పగానే పవన్ అభిమానులకు “ఆడువారి మాటలకు అర్థాలే వేరులే..” పాట గుర్తుకు వస్తుంది. పవన్ మాజీ భార్య రేణు దేశాయ్ కి మాత్రం మరో సంఘటన గుర్తుకొస్తుంది. ఈ విషయాన్ని ఆమె నేడు సోషల్ మీడియా వేదికగా పంచుకున్నారు. “ఆడువారి మాటలకు అర్థాలే వేరులే’ పాట చిత్రీకరణ మొత్తం న్యూజిలాండ్లో జరిగింది. ఈ పాటలో బెల్ కూడా ఉంది. (న్యూ ఫౌండ్ల్యాండ్ జాతికి చెందిన శునకం. అది పవన్ పెంపుడు కుక్కే.) షూటింగ్ సమయంలో అందరూ బెల్ ఆకారాన్ని చూసి భయపడేవారు.
ఆ సమయంలో నేను ‘ఖుషి’ సినిమాకు సహాయ దర్శకురాలిగా, సహాయ ప్రొడక్షన్ పర్సన్గా పనిచేశాను. సెట్స్లో అందరూ బెల్కు భయపడుతుండడంతో షూటింగ్ అయిపోయేంతవరకు నేనే దాన్ని దగ్గరుండి చూసుకున్నాను. కానీ బెల్ చాలా మంచిది. దానితో చాలా సరదాగా గడిపాం. అవి అందమైన, ఆనందకరమైన షూటింగ్ జ్ఞాపకాలు” అని చెబుతూ బెల్తో కలిసి దిగిన ఫొటోను రేణు పంచుకున్నారు. పవన్ నుంచి విడాకులు తీసుకున్న ఈమె త్వరలోనే మరో పెళ్లి చేసుకోబోతున్నారు.
