మహేష్ బాబు ఫ్రెండ్ గా ఆర్జే బాలాజీ!

సూపర్ స్టార్ మహేష్ బాబుకి స్నేహితుడిగా నటించే అవకాశాన్ని తమిళ నటుడు ఆర్జే బాలాజీ సొంతం చేసుకున్నారు. ట్యాలెంటెడ్ డైరక్టర్ మురుగ దాస్, ప్రిన్స్ కాంబినేషన్లో తెరకెక్కుతున్న యాక్షన్ థ్రిల్లర్ మూవీ షూటింగ్ రెండో షెడ్యూల్ హైదరాబాద్ నగరంలో జోరుగా సాగుతోంది. తెలుగు, తమిళ్ భాషల్లో ఒకేసారి నిర్మితమవుతున్న ఈ ఫిల్మ్ లో రెండు భాషలకు చెందిన నటులను సమపాళ్లలో మిక్స్ చేస్తున్నారు మురుగ దాస్.

విలన్ గా తమిళ దర్శకుడు ఎస్.జె.సూర్య ఎంపిక చేసి ఈ చిత్రానికి కొత్త ఫ్లేవర్ అద్దారు. ఇప్పుడు మరో తమిళ నటుడిని సెలక్ట్ చేశారు. ఈ విషయం పై బాలాజీ మాట్లాడుతూ ” నాకు గొప్ప దర్శకులతో పని చేయాలని ఆశ ఉంది. అటువంటి వారిలో మురుగ దాస్ ఒకరు. అయన నాకు మహేష్ స్నేహితుడి పాత్రను ఇచ్చారు. ఆ క్యారక్టర్ నాకు చాలా బాగా నచ్చింది. కొన్ని క్లిష్టమైన పరిస్థితుల్లో హీరోతో కలిసి పోరాడే పాత్ర నాది.” అన్నారు. మహేష్ పక్కన ఉండి నవ్వించే పాత్రను ఆర్జే బాలాజీ చేస్తున్నాడు అనే వార్తల్లో వాస్తవం లేదని ఆయన స్పష్టం చేశారు. తాను త్వరలో చిత్రీకరణలో పాల్గొననున్నట్లు వెల్లడించారు. ఎం.వి.ప్రసాద్, ఠాగూర్ మధులు సంయుక్తంగా భారీ బడ్జెట్ తో నిర్మిస్తున్న ఈ సినిమాకు హరీష్ జయ రాజ్ సంగీతాన్ని అందిస్తున్నారు.