వయ్యారంతో అలరించిన రామలక్ష్మి!

సుకుమార్ దర్శకత్వంలో రూపుదిద్దుకుంటున్న రంగస్థలం సినిమాలో రామ్ చరణ్ ఎలా ఉంటారో తొలి టీజర్ ద్వారా చూపించారు. ఆ వీడియోలో సౌండ్ ఇంజినీర్ చిట్టి బాబుగా చెర్రీ మంచి మార్కులు కొట్టేశారు. అయితే అప్పుడు అతనికి జోడీగా నటించిన సమంత రోల్ మాత్రం రివీల్ చేయలేదు. ఈ రోజు ఆమె పోషించిన రామలక్ష్మి టీజర్ ని చిత్ర బృందం రిలీజ్ చేసింది. అందం, అమాయకత్వం నిండిన అచ్చమైన తెలుగింటి ఆడపచులా సమంత ఆకట్టుకుంది. ప్రతి చిత్రంలో గలగలా గోదారిలా మాట్లాడి సందడి చేసే సమంత.. ఇందులో మాత్రం సందడిని గోదారికి ఇచ్చేసి… తాను మాత్రం మౌనంతోనే ఎన్నో చెప్పింది. సినిమాలో కన్నులతోనే కవ్వించి, నవ్వించి.. ఏడిపించనున్నట్లు తేల్చి చెప్పింది. రామలక్ష్మి వయ్యారం గురించి చిట్టిబాబు (రామ్ చరణ్ తేజ్ ) తనదైన స్టైల్ ల్లో చెప్పారు.  హీరోయిన్ కోసం టీజర్ ని రిలీజ్ చేసి సుకుమార్ కొత్త ఒరవడి సృష్టించారు. అలాగే ఈ చిత్రం తొలి పాటని ఫిబ్రవరి 13 న రిలీజ్ చేయనున్నట్లు తెలిపారు. సమంత అద్భుతంగా నటించిన ఈ టీజర్ కూడా రంగస్థలం టీజర్ అందుకున్న వ్యూస్ ని చేరుకుంటుందని సినీ విశ్లేషకులు చెబుతున్నారు. మైత్రి మూవీ మేకర్స్ వారు నిర్మిస్తున్న ఈ చిత్రంలో జగపతి బాబు, ఆది, అనసూయ కీలక పాత్రలు పోషించారు. రాక్ స్టార్ దేవీ శ్రీ ప్రసాద్ సంగీతమందిస్తున్న ఈ చిత్రం మార్చి 30 న రిలీజ్ కానుంది. ధృవ వంటి హిట్ తర్వాత రామ్ చరణ్ చేసిన ఈ చిత్రంపై భారీ అంచనాలు ఉన్నాయి.