సినీ రంగంలో తన నటనతో ప్రత్యేక గుర్తింపు తెచ్చుకున్న సమంత (Samantha) , ఇప్పుడు ఓటీటీ విభాగంలోనూ తనదైన హవాను కొనసాగిస్తోంది. బిగ్ స్క్రీన్ ను దాటి, కొత్త ప్రయోగాలతో ప్రేక్షకులను ఆకట్టుకుంటూ, ఓటీటీలో దక్షిణాది కథానాయికలలో నెంబర్ వన్ స్థానాన్ని సొంతం చేసుకున్నారు. “ఫ్యామిలీ మాన్ 2″తో ఆమె ఈ రంగంలో అడుగుపెట్టినప్పుడే ప్రేక్షకుల మన్ననలు అందుకున్నారు. తాజాగా “సిటాడెల్: హనీ బన్నీ” సిరీస్‌లో యాక్షన్ క్వీన్‌గా చెలామణి అవుతూ, సమంత తన ప్రతిభను మరోసారి నిరూపించుకున్నారు.
ఈ సిరీస్‌లో హనీ పాత్రకు తనదైన మార్క్ సెట్ చేసిన సమంత, ప్రేక్షకులను విపరీతంగా ఆకట్టుకున్నారు. ప్రత్యేకంగా, ఈ సిరీస్ కోసం ఆమె రూ. 10 కోట్లు రెమ్యునరేషన్ తీసుకోవడంతో, సౌత్ ఇండస్ట్రీలో అత్యధిక పారితోషికం తీసుకున్న కథానాయికగా రికార్డు సృష్టించారు. మహిళా పాత్రలకు సాధారణంగా తక్కువ పారితోషికం ఉండే సినీ రంగంలో, సమంత సాధించిన ఈ ఘనత హైలెట్ అయ్యింది. మయోసైటిస్‌తో పోరాడి, ఏడాది విరామం తర్వాత తనకంటూ కొత్త ఇమేజ్‌ను క్రియేట్ చేసుకున్న ఆమె ధైర్యం, పట్టుదలను ప్రత్యేకంగా ప్రశంసించారు.
ఫిలింఫేర్ 65వ ఉత్సవాల్లో భాగంగా సమంత కవర్ స్టోరికి ముఖ్యాంశంగా మారారు. ఆమె నటన, స్టైల్, కష్టపడి సాధించిన విజయాల గురించి ప్రత్యేక కథనాన్ని విడుదల చేసింది. ఈ కవర్ స్టోరీలో సమంత ఫోటోషూట్ ఇప్పటికే వెబ్‌లో వైరల్ అవుతోంది. ప్రేక్షకులతో పాటు, ఇండస్ట్రీలోని ఇతర నటీనటులు కూడా సమంత విజయాలను ప్రశంసిస్తున్నారు.
సమంత విజయాల కారణంగా ఓటీటీలో దక్షిణాది కథానాయికలకూ పెద్ద ఎత్తున అవకాశాలు వస్తున్నాయి. త్రిష, కీర్తి సురేష్ వంటి అగ్ర కథానాయికలు కూడా ఈ మాధ్యమాన్ని ఎంచుకుంటున్నారు. కానీ, సమంత వీరందరినీ తన టాలెంట్, మార్కెట్ డామినేషన్‌తో దాటిపోతున్నారు. “సిటాడెల్” తర్వాత ఆమెకు మరిన్ని అంతర్జాతీయ ప్రాజెక్టులు వస్తున్నాయని వార్తలు వినిపిస్తున్నాయి.
