నాగార్జున, నాని సినిమాలో సమంత

నాగ‌చైత‌న్య‌ని వివాహం చేసుకొని అక్కినేని కోడ‌లిగా ప్ర‌మోష‌న్ అందుకున్న స‌మంత ప్ర‌స్తుతం ప‌లు ప్రాజెక్ట్స్‌తో బిజీగా ఉంది. తెలుగులో రామ్ చ‌ర‌ణ్ స‌ర‌స‌న రంగ‌స్థ‌లంలో న‌టించిన సామ్ మ‌హాన‌టిలోను న‌టిస్తుంది. ఇక ఇప్పుడు నాగ్‌-నాని మ‌ల్టీ స్టార‌ర్ చిత్రంలోను ఓ పాత్ర పోషించ‌నుంద‌ని తెలుస్తుంది. భలేమంచి రోజు, శమంతకమణి సినిమాల డైరెక్టర్ శ్రీరామ్ ఆదిత్య ద‌ర్శ‌క‌త్వంలో మ‌ల్టీ స్టార‌ర్ ప్రాజెక్ట్ తెరెక్క‌నుండగా ఈ మూవీ ఫిబ్ర‌వ‌రి 24న పూజా కార్య‌క్ర‌మాలు జ‌రుపుకోనుంది. లాంచ్ అయిన కొద్ది రోజుల‌లోనే సినిమాని సెట్స్ పైకి తీసుకెళ్ల‌నున్నారు. సి. అశ్వినీద‌త్ నిర్మాణంలో రూపొంద‌నున్న ఈ చిత్రంలో నాగార్జున డాన్‌గా క‌నిపిస్తాడ‌ని, నాని డాక్ట‌ర్ పాత్ర పోషించ‌నున్నాడ‌ని అంటున్నారు. కామెడీ ఎంటర్టైనర్ గా రూపొందనున్న ఈ సినిమా కోసం ఇప్ప‌టికే శ్ర‌ద్ధా శ్రీనాథ్‌ని క‌థానాయిక‌గా తీసుకున్నారని తెలుస్తుండ‌గా, మ‌రో క‌థానాయిక కోసం అన్వేష‌ణ జ‌రుగుతుంది.

మ‌ల్టీ స్టార‌ర్ చిత్రంలో స‌మంత కీల‌క పాత్ర పోషించ‌నుంద‌ని రూమ‌ర్స్ వ‌స్తున్నాయి. గ‌తంలో నాగ్ న‌టించిన మ‌నం, రాజు గారి గ‌ది 2 చిత్రంలో ముఖ్య పాత్ర‌లు పోషించిన స‌మంత ఈ చిత్రంలో ఎలాంటి పాత్ర పోషంచ‌నుంది అనే దానిపై అభిమానుల‌లో ఆస‌క్తి నెల‌కొంది. దీనిపై క్లారిటీ రావ‌లసి ఉంది. ఈ చిత్రానికి మ‌ణిశ‌ర్మ సంగీతం అందించ‌నున్నాడు. నాని స‌ర‌స‌న ఈగ చిత్రంలో క‌థానాయిక‌గా న‌టించిన స‌మంత మ‌ల్టీ స్టార‌ర్ మూవీలో నానితో జ‌త క‌డుతుందా లేదంటే కీల‌క పాత్ర చేస్తుందా అనే దానిపై జోరుగా చ‌ర్చ‌లు జ‌రుగుతున్నాయి. నాని నిర్మాణంలో రూపొందిన అ మూవీ ఈ రోజు విడుద‌ల కానుండ‌గా, ఆయ‌న న‌టిస్తున్న కృష్ణార్జున యుద్ధం ఏప్రిల్‌లో రిలీజ్ కానుంది. ఇక నాగ్ .. వ‌ర్మ సినిమాతో బిజీగా ఉన్న విష‌యం విదిత‌మే.